YAP Nizami rayon təşkilatının təsis olunmasının 30-cu ildönümü qeyd edilib
Yeni Azərbaycan Partiyası Nizami rayon təşkilatının təsis olunmasının 30 illik yubileyi münasibətilə tədbir keçirilib.
Reportyorinfo.az xəbər verir ki, tədbir iştirakçıları əvvəlcə Ümummilli Lider Heydər Əliyevin büstü önünə gül dəstələri düzüb, xatirəsini ehtiramla yad ediblər.
Azərbaycanın Dövlət Himninin səsləndirilməsi ilə başlayan tədbirdə Ulu Öndər Heydər Əliyevin, eləcə də ölkəmizin ərazi bütövlüyü və suverenliyi uğrunda mübarizədə canlarını qurban vermiş şəhidlərimizin xatirəsi bir dəqiqəlik sükutla yad edilib.
YAP Nizami rayon təşkilatının təsis iclasının keçirildiyi SOCAR-ın Heydər Əliyev adına Neft Emalı zavodunun akt zalında davam etdirilən tədbirdə çıxış edən Nizami Rayon İcra Hakimiyyətinin başçısı Coşqun Cəbrayılov, YAP Nizami rayon təşkilatına 2008-2021-ci illər ərzində sədrlik etmiş Milli Məclisin deputatı Sədaqət Vəliyeva, YAP Nizami rayon təşkilatının təsisçilərindən olan Edilman Məmmədov, Yeni Azərbaycan Partiyası Nizami rayon təşkilatının sədri Ramil Vəlibəyov və başqaları çıxış ediblər.
Bildirilib ki, Yeni Azərbaycan Partiyası Nizami rayon təşkilatı 1993-cü il sentyabr ayının 11-də 76 nəfərin iştirakı ilə təsis edilib. Rayon təşkilatı ötən 30 il ərzində uğurlu inkişaf yolu keçib, bütün ictimai-siyasi kampaniyalarda yüksək fəallıq nümayiş etdirib, partiya aktivlərinin sırası genişlənərək 110 ərazi partiya təşkilatında birləşmiş 15 minlik təşkilata çevrilib.
Vurğulanıb ki, Ulu Öndər Heydər Əliyevin qurucusu olduğu, zəngin siyasi və dövlətçilik təcrübəsinə söykənən Yeni Azərbaycan Partiyası ölkədə ən güclü, monolit siyasi təşkilatdır. Dünənin, bu günün və gələcəyin partiyası bu gün Prezident İlham Əliyevin Sədrliyi ilə uğurla inkişaf edir, regionun ən böyük siyasi təşkilatına çevrilib. Yeni Azərbaycan Partiyası bundan sonra da ölkəmizdə gedən bütün proseslərin mərkəzində olacaq, xalqın və dövlətin mənafeyi naminə fəaliyyətini davam etdirəcək.
Tədbirin sonunda YAP Nizami rayon təşkilatının təsisçiləri, rayon təşkilatının ictimai-siyasi həyatında uzun müddətdir fəallıq edən və bu il yubiley yaşında olan partiya veteranları təltif olunub, rayon təşkilatının könüllülük layihəsinin məzunlarına sertifikatlar verilib, partiyaya yeni üzv qəbul edilmiş şəxslərə isə vəsiqələri təqdim edilib. Həmçinin, YAP Nizami rayon təşkilatının əməkdaşları səmərəli fəaliyyətlərinə görə Nizami Rayon İcra Hakimiyyəti tərəfindən Fəxri fərmanlarla mükafatlandırılıblar.
