Prezident İlham Əliyevin “Euronews” televiziyasına verdiyi müsahibə bir sıra vacib qlobal və regional məsələləri əhatə edib. Müsahibə zamanı beynəlxalq siyasətə yanaşmanın formalaşmasında Qlobal Bakı Forumunun rolu, Cənubi Qafqazda davam edən proseslər və dünyada baş verən qlobal dəyişikliklər geniş müzakirə olunub.
Dövlət başçısı müsahibəsində XII Qlobal Bakı Forumunun əhəmiyyətini xüsusi vurğulayıb. O, Forumun dünya siyasətində mühüm rol oynayan nüfuzlu şəxsləri bir araya gətirdiyini və beynəlxalq məsələlərin müzakirəsi üçün platforma rolunu oynadığını qeyd edib. Prezidentin sözlərinə görə, bugünkü mürəkkəb geosiyasi şəraitdə bu cür dialoq platformaları ölkələrin mövqelərinin aydın ifadə olunması və gələcək əməkdaşlıq imkanlarının dəyərləndirilməsi baxımından xüsusi önəm daşıyır. Azərbaycan beynəlxalq arenada sülhə və əməkdaşlığa töhfə verməklə yanaşı, qlobal problemlərin həllinə də öz töhfəsini verməyə çalışır. Forum çərçivəsində dünyanın müxtəlif regionlarında mövcud olan problemlər, beynəlxalq hüquq normalarının tətbiqi və yeni çağırışlar ətrafında müzakirələr aparılır.
Prezident İlham Əliyev müsahibədə Cənubi Qafqazdakı vəziyyətə də toxunub. O qeyd edib ki, uzun illərdir bu region qarşıdurma və düşmənçilik bölgəsi olub. Azərbaycan 30 ilə yaxın davam edən işğala son qoyaraq ərazi bütövlüyünü bərpa edib və hazırda sülh quruculuğu istiqamətində mühüm addımlar atır.
Prezident bildirib ki, regionda davamlı sülhün təmin olunması üçün təhlükəsizlik mexanizmləri yaradılmalıdır. O, yeni müharibələrin qarşısını almaq üçün qonşu ölkələr arasında etimad mühitinin formalaşmasının vacibliyini vurğulayıb. Azərbaycanın bu istiqamətdə apardığı siyasət, xüsusilə də Ermənistanla sülh sazişinin imzalanması üçün aparılan danışıqlar, bölgədə davamlı sabitlik üçün əhəmiyyətli hesab edilir. Müsahibə zamanı Prezident İlham Əliyev qlobal miqyasda baş verən dəyişikliklərə də münasibət bildirib. O vurğulayıb ki, hazırkı beynəlxalq sistem əvvəlki dövrlərdən ciddi şəkildə fərqlənir və yeni dünya düzəni formalaşmaqdadır. Ənənəvi beynəlxalq hüquq normalarının selektiv tətbiq olunduğunu qeyd edən dövlət başçısı, ölkələrin daha çox öz daxili resurslarına güvənməsinin vacibliyini diqqətə çatdırıb. Azərbaycanın öz inkişaf modelini məhz daxili potensialı hesabına qurduğunu bildirən Prezident, ölkəmizin müstəqil siyasət yürütməsinin əhəmiyyətini vurğulayıb. O qeyd edib ki, gələcəkdə beynəlxalq münasibətlərdə ikitərəfli əməkdaşlıqlar daha çox ön plana çıxacaq, çünki bəzi beynəlxalq təşkilatlar artıq öz effektivliyini itirir. Prezident İlham Əliyevin “Euronews” televiziyasına verdiyi müsahibə, Azərbaycanın beynəlxalq arenadakı mövqeyi, Cənubi Qafqazda sülh quruculuğu və qlobal dəyişikliklərə baxışını aydın şəkildə ortaya qoyur. Azərbaycan dünya siyasətində mühüm aktorlardan birinə çevrilərək, regionda sabitlik və inkişafın təmin olunması üçün öz səylərini davam etdirir. Bu müsahibə bir daha sübut edir ki, ölkəmiz qlobal proseslərdə aktiv iştirak edir və müstəqil xarici siyasət kursu yürüdərək öz maraqlarını qətiyyətlə müdafiə edir.
İlham Quliyev,
YAP-ın gənc fəalı
