Gürcüstan parlamenti “2026-cı ilin dövlət büdcəsi haqqında” qanun layihəsinə bir sıra düzəlişlər edib.
“Reportyorinfo.az” xəbər verir ki, bu barədə ölkənin maliyyə naziri Laşa Xutişvili parlamentdə məlumat verib.
Nazir bildirib ki, 2026-cı ilin icmal büdcəsinin xərclər hissəsi 35,5 milyard lari təşkil edir və bu çərçivədə dövlətin bütün maliyyə öhdəlikləri tam şəkildə təmin olunur.
Laşa Xutişvilinin sözlərinə görə, Gürcüstanın 2026-cı il dövlət büdcəsinin ümumi gəlirləri 30 milyard 290,8 milyon lari, dövlət büdcəsindən ayrılacaq vəsaitin həcmi isə 30 milyard 475,9 milyon lari müəyyən edilib.
Layihəyə əsasən, 2026-cı il büdcəsində real iqtisadi artım 5 faiz, ortamüddətli real iqtisadi artım proqnozu isə 5,3 faiz nəzərdə tutulub. ÜDM deflyatoru proqnozu 4 faiz, sonrakı illərdə isə bu göstərici 3 faiz təşkil edir. Gələn il orta inflyasiyanın proqnozu 3,6 faiz, ortamüddətli dövrdə isə hədəf göstərici daxilində 3 faiz proqnozlaşdırılıb.
Layihədə nominal ÜDM proqnozu 110,5 milyard lari səviyyəsində müəyyən edilib. Adambaşına düşən ümumi daxili məhsul isə 10,900 dolları ötüb.
İcmal büdcənin vergi gəlirləri 26,8 milyard lari məbləğində müəyyən edilib ki, bu da ÜDM-in 24,2 faizini təşkil edir. Gələn ilin əsas maliyyə sənədində büdcə kəsiri ÜDM-in 2,5 faizi, dövlət borcu göstəricisi isə ÜDM-in 35 faizi daxilindədir.
Yuxarıda göstərilənlər nəzərə alınmaqla, 2026-cı ilin icmal büdcəsinin xərc hissəsi ümumilikdə 35,5 milyard lari təşkil edir ki, bunun çərçivəsində dövlətin üzərinə götürdüyü öhdəliklər tam maliyyələşdirilir.
Qeyd edək ki, gələn ilin göstəriciləri cari ilin göstəricilərindən xeyli çoxdur. “Gürcüstanın 2025-ci ilin dövlət büdcəsi haqqında” qanun layihəsində real iqtisadi artım 5,5 faiz, ortamüddətli dövrdə isə real iqtisadi artımın proqnozu 5,3 faiz təşkil edir. Cari il üçün orta inflyasiya proqnozu hədəf göstəricidən əhəmiyyətli dərəcədə aşağıdır və 1,5 faizdir, ortamüddətli dövrdə isə hədəf göstərici 3 faiz səviyyəsindədir. Nominal ÜDM-in proqnozu 97,4 milyard lari səviyyəsində müəyyən edilib, adambaşına hesablanmış ümumi daxili məhsul isə 9600 dollara yaxındır.
2025-ci ilin birləşmiş büdcəsinin xərc hissəsi cəmi 31,2 milyard lari təşkil edir.
