Bakı, 8 yanvar 2026 — Bu gün Bakıda, “Gülüstan” sarayında Səudiyyə Ərəbistanının “ACWA Power” şirkəti tərəfindən inşa edilmiş 240 meqavat gücündə “Xızı-Abşeron” Külək Elektrik Stansiyasının rəsmi açılış mərasimi keçirildi. Tədbirdə ölkə başçısı Prezident İlham Əliyev iştirak etdi və stansiyanın istismara verilməsi münasibətilə geniş çıxış etdi.
Prezident İlham Əliyev çıxışına tədbir iştirakçılarını və qonaqları səmimiyyətlə salamlayaraq başladı və bu günün Azərbaycanın enerji tarixi üçün əlavə əhəmiyyətli bir gün olduğunu vurğuladı. O, “Xızı-Abşeron” Külək Elektrik Stansiyasının ölkənin enerji potensialını daha da gücləndirəcəyini və artıq bu gün fəaliyyətə başladığını bildirdi. Prezident çıxışında bir sıra strateji məqamlara da toxundu. O, “ACWA Power” şirkətinə təşəkkür etdi və bu şirkətin Azərbaycanda həyata keçirdiyi bu layihənin ilk olmasına baxmayaraq, son deyiləcəyini bildirdi. Azərbaycan dövlətinin bu cür təşəbbüslərə tam dəstək verdiyini və gələcəkdə əlavə bərpaolunan enerji layihələrinin planlaşdırıldığını söylədi. Prezident həmçinin qeyd etdi ki, bu layihə ölkənin enerji təhlükəsizliyini gücləndirir və bərpaolunan enerji sektorunda yeni dövrün başlanğıcını qoyur.
Çıxışının başqa bir hissəsində İlham Əliyev Azərbaycanın investisiya mühitinin əlverişli olduğunu xüsusi vurğuladı. Ölkənin xarici investisiyaları cəlb etmə qabiliyyətindən danışaraq, artıq yüz milyardlarla dollar xarici investisiyanın ölkəyə daxil olduğunu qeyd etdi, bu da Azərbaycanın iqtisadi sabitliyinin və investorlar üçün cəlbedici mühitin göstəricisidir. Prezident ətraf mühitin qorunması və iqtisadi inkişafın balanslaşdırılması məsələlərinə də toxunaraq, bərpaolunan enerji layihələrinin ölkənin dayanıqlı inkişaf strategiyasının əsas komponenti olduğunu vurğuladı.
Prezident İlham Əliyev çıxışını yekunlaşdıraraq, 2026-cı ili “At ili” kimi qeyd etdiklərini və bu simvolun Azərbaycana uğur gətirəcəyinə inandığını bildirdi. O, ölkənin bu sahədə daha böyük nailiyyətlərə imza atacağına ümidini ifadə etdi və bu böyük layihənin həyata keçirilməsində əməyi keçən hər kəsə təşəkkürünü bildirdi.
Prezident İlham Əliyevin çıxışı “Xızı-Abşeron” Külək Elektrik Stansiyasının açılışını sadəcə enerji layihəsi kimi deyil, Azərbaycanın strateji enerji planının gələcəyi üçün mühüm addım kimi xarakterizə etdi. Layihə təkcə ölkənin enerji gücünü artırmır, həm də Azərbaycanda bərpaolunan enerji sektorunun gələcək inkişafı üçün güclü bir stimul yaradır.
Əlizadə Günel,
Yeni Azərbaycan partiyası,məsləhətçi
