Azərbaycan Respublikasının Silahlı Qüvvələri Günü, ölkəmizin suverenliyinin, ərazi bütövlüyünün və müstəqilliyinin baş təminatçısı olan rəşadətli ordumuzun şərəf günüdür. Bu tarixi günün kökləri 1918-ci ilə – Azərbaycan Xalq Cümhuriyyəti dövrünə təsadüf edir. Həmin il iyunun 26-da hökumətin qərarı ilə ilk müntəzəm hərbi hissə – Əlahiddə Azərbaycan Korpusu yaradıldı. Bununla da müasir və mütəşəkkil ordu quruculuğunun əsası qoyuldu. Ulu öndər Heydər Əliyevin 1998-ci ildə imzaladığı Fərmanla bu şanlı tarixin rəsmiləşdirilməsi və 26 İyunun Silahlı Qüvvələr Günü elan edilməsi, orduya olan dövlət qayğısının və xalqın öz müdafiəçilərinə olan sonsuz inamının bariz nümunəsidir.
Azərbaycan ordusu ötən onilliklər ərzində böyük bir inkişaf yolu keçmişdir. Hazırda Silahlı Qüvvələrimiz regionun ən güclü, dünyanın isə aparıcı orduları sırasında yer alır. Bu uğurun arxasında duran əsas amillər ordumuzun ən son hərbi texnologiyalar, pilotsuz uçuş aparatları və yüksək dəqiqlikli raket kompleksləri ilə təchiz olunması, hərbçilərimizin beynəlxalq standartlara uyğun peşəkar hazırlığı və əsgərlərimizin sarsılmaz vətənpərvərlik hissidir.
Azərbaycan Silahlı Qüvvələri özünün ən parlaq tarixini 44 günlük Vətən Müharibəsində yazdı. Müzəffər Ali Baş Komandanın rəhbərliyi altında ordumuz 30 ilə yaxın işğal altında qalan torpaqlarımızı azad edərək ölkəmizin ərazi bütövlüyünü bərpa etdi. 2023-cü ilin sentyabrında həyata keçirilən antiterror tədbirləri isə suverenliyimizin bütün ölkə ərazisində tam təmin olunması ilə nəticələndi. Bu gün azad edilmiş doğma torpaqlarımızda dalğalanan üçrəngli bayrağımız Azərbaycan əsgərinin qəhrəmanlığının və şəhidlərimizin qanının rəmzidir.
26 İyun təkcə hərbçilərin deyil, bütövlükdə ordusuna güvənən, onunla qürur duyan hər bir Azərbaycan vətəndaşının bayramıdır. Bu əlamətdar gündə vətən naminə canından keçən şəhidlərimizin əziz xatirəsini dərin ehtiramla yad edir, sərhədlərimizin keşiyində dayanan hər bir əsgərimizə və zabitimizə minnətdarlığımızı bildiririk.
İldırım Eyvazlı,
YAP-ın gənc fəalı
