26 avqust Azərbaycan tarixində mühüm günlərdən biri kimi xüsusi əhəmiyyət daşıyır. Bu tarix Laçın şəhərinin işğaldan azad edildiyi gün olmaqla yanaşı, milli iradənin, dövlət gücünün və ərazi bütövlüyünün bərpasının parlaq nümunəsidir. Azərbaycan Prezidentinin 31 iyul 2023-cü il tarixli Sərəncamı ilə 26 avqustun Laçın Şəhəri Günü kimi qeyd olunması bu tarixi hadisənin dövlət səviyyəsində əbədiləşdirilməsinə xidmət edir.
Laçının azad olunması 44 günlük Vətən müharibəsində əldə edilən Zəfərin məntiqi davamı idi. 2020-ci il dekabrın 1-də Laçın rayonu Azərbaycana qaytarılsa da, şəhərin və Zabux, Sus kəndlərinin azadlığı 2022-ci il avqustun 26-da təmin edildi. Bu hadisə həm hərbi-siyasi, həm də strateji baxımdan mühüm mərhələ oldu.
Bu gün Laçın yalnız azad edilmiş şəhər deyil, Böyük Qayıdışın mühüm ünvanlarından biridir. Şəhərdə yaşayış binaları, sosial obyektlər, məktəblər, səhiyyə müəssisələri, enerji və kommunal infrastrukturlar yaradılır. 2023-cü il mayın 27-dən etibarən keçmiş məcburi köçkünlərin Laçına qayıdışına başlanılması isə Zəfərin real nəticəsinin insan amili üzərində qurulduğunu göstərir.
Laçının inkişafında iqtisadi layihələr də xüsusi yer tutur. Aqro-Sənaye Parkının fəaliyyəti, yeni istehsal müəssisələrinin yaradılması və müxtəlif təsərrüfat layihələrinin həyata keçirilməsi şəhərin gələcəkdə regionun iqtisadi fəallıq mərkəzlərindən birinə çevrilməsinə imkan yaradır. Burada məqsəd yalnız dağıdılmış şəhəri yenidən qurmaq deyil, müasir, dayanıqlı və insanların rahat yaşayacağı bir şəhər modeli formalaşdırmaqdır.
Laçının bərpası eyni zamanda tarixi-mədəni irsin qorunması baxımından mühüm əhəmiyyət daşıyır. Şəhərdə keçirilən mədəni tədbirlər, milli mətbəxin, folklorun və incəsənətin təqdimatı doğma yurda qayıdan insanların yaddaşını gələcək nəsillərlə birləşdirən mənəvi körpü yaradır.
Laçın Şəhəri Günü bu baxımdan yalnız təqvimdə qeyd olunan bir tarix deyil. Bu gün Azərbaycanın torpaqlarına qayıdışının, dağıdılmış şəhərlərin yenidən qurulmasının və Böyük Qayıdış strategiyasının simvoludur. Laçının bugünkü siması göstərir ki, Zəfər yalnız ərazilərin azad edilməsi ilə tamamlanmır; əsl qələbə həmin torpaqlarda həyatın, quruculuğun və firavanlığın yenidən bərqərar olması ilə möhkəmlənir.
Aynur Mehdiyeva,
YAP Nizami rayon təşkilatının məsləhətçisi
