Xankəndinin gələcəyi Qarabağın yeni ictimai və iqtisadi həyatının formalaşması baxımından xüsusi əhəmiyyət daşıyır. Şəhərin yenidən qurulması təkcə yaşayış fondunun bərpası ilə məhdudlaşmır. Burada müasir nəqliyyat, biznes, konqres və ictimai məkanların yaradılması şəhərin regional mərkəz kimi funksiyalarının genişləndirilməsi istiqamətində addımlar kimi qiymətləndirilə bilər. 2025-ci ilin iyulunda Xankəndidə Zəfər parkında tikinti işləri ilə yanaşı, “Xankəndi” Biznes Mərkəzi və Konqres Mərkəzi kimi obyektlərin istifadəyə verilməsi də bu yeni mərhələnin mühüm nümunələri olub.
Xankəndidə nəqliyyat infrastrukturunun yaradılması isə şəhərin Qarabağın digər yaşayış məntəqələri ilə əlaqələrini gücləndirmək məqsədi daşıyır. Ağdam–Xankəndi dəmir yolu layihəsi çərçivəsində yeni stansiyaların, körpülərin, yolötürücülərin və digər mühəndis qurğularının tikintisi nəzərdə tutulur. Xankəndi Dəmir Yolu və Avtovağzal Kompleksinin gündəlik minlərlə sərnişinə xidmət göstərəcək şəkildə layihələndirilməsi şəhərin gələcək nəqliyyat imkanlarının miqyasını göstərir.
Şəhərin ictimai həyatının yenidən qurulması mədəniyyət, biznes, təhsil, idman və turizm istiqamətlərinin bir-birini tamamlamasını tələb edir. Xankəndinin Qarabağdakı mövqeyi ona yalnız inzibati və coğrafi əhəmiyyət deyil, həm də insanların bir araya gəldiyi, müxtəlif fəaliyyətlərin cəmləşdiyi şəhər məkanı olmaq imkanı yaradır. Bu baxımdan yeni şəhərsalma yalnız binaların yerləşdirilməsi deyil, şəhər həyatının bütün komponentlərinin paralel şəkildə qurulması prosesidir.
Xankəndinin yeni siması zaman keçdikcə daha aydın formalaşacaq. Burada qurulan yollar, ictimai məkanlar, nəqliyyat şəbəkəsi və biznes infrastrukturu şəhərin gələcək iqtisadi və sosial potensialının əsasını təşkil edə bilər. Beləliklə, Xankəndinin yenidən qurulması Qarabağın yalnız fiziki deyil, ictimai həyatının da yenidən təşkili prosesinin mühüm hissəsinə çevrilir.
Fariz Hüseyinli,
YAP Nizami rayon təşkilatının fəalı
