Qubadlı torpağının adı Azərbaycan xalqının qəlbində xüsusi bir duyğu oyadır. Bu adın içində doğma yurdun həsrəti, uşaqlıq xatirələri, ailə ocağının istisi və azadlıq arzusu birləşir. 25 Oktyabr – Qubadlı Şəhəri Günü məhz bu duyğuların böyük qələbə sevinci ilə qovuşduğu gündür. Şəhərin işğaldan azad olunması xalqımızın uzun illər qəlbində yaşatdığı arzunun gerçəkləşməsi, doğma torpağın yenidən öz sahiblərinə qovuşacağına inamın güclənməsi demək idi. Bu tarix hər bir azərbaycanlıya göstərir ki, Vətən sevgisi nə zamanla zəifləyir, nə də məsafələrlə unudulur.
Qubadlının gözəllikləri onun təbiətində olduğu qədər, insanlarının mənəvi dünyasında da yaşayır. Bu diyarın sakinləri öz qonaqpərvərliyi, zəhmətsevərliyi və doğma torpağa bağlılığı ilə seçilirlər. İllər əvvəl doğma yurdlarından ayrılmağa məcbur qalan insanlar harada yaşamasından asılı olmayaraq, Qubadlını özlərinin mənəvi ünvanı hesab etdilər. Onlar ailə məclislərində, söhbətlərində və xatirələrində bu torpağın adını yaşatdılar. Hər yeni nəsil Qubadlı haqqında danışılan hekayələrlə böyüdü, doğma torpağa sevgi və məsuliyyət hissi ilə tərbiyə olundu. Beləliklə, Qubadlı yalnız bir şəhər deyil, həm də yaddaşlarda yaşayan böyük bir mənəvi dünyaya çevrildi.
2020-ci il oktyabrın 25-də Qubadlının azad edilməsi Azərbaycanın şanlı Zəfər tarixinin mühüm səhifəsini təşkil etdi. Azərbaycan əsgərinin mərdliyi, zabitlərimizin peşəkarlığı və xalqımızın birliyi bu tarixi qələbənin əldə olunmasında həlledici rol oynadı. Ali Baş Komandan İlham Əliyevin rəhbərliyi ilə Azərbaycan öz gücünü, əzmini və torpaqlarına sahib çıxmaq iradəsini nümayiş etdirdi. Qubadlı uğrunda döyüşlərdə göstərilən qəhrəmanlıq xalqımızın yaddaşında əbədi qalacaq. Bu qələbənin arxasında şəhidlərimizin müqəddəs qanı, qazilərimizin fədakarlığı və bütün xalqımızın böyük inamı dayanır. Onların əziz xatirəsi qarşısında baş əyir, Vətən uğrunda göstərdikləri igidliyi minnətdarlıqla yad edirik.
Qubadlının azadlıq nəğməsi bu gün quruculuq və inkişaf nəğməsi ilə davam edir. Bölgənin bərpası, yaşayış məntəqələrinin yenidən qurulması və doğma torpaqlarda həyatın canlandırılması Azərbaycanın gələcəyə hesablanmış siyasətinin mühüm istiqamətlərindəndir. Hər görülən iş, hər yeni layihə Qubadlının sabahına olan inamı daha da möhkəmləndirir. Bu şəhərin yenidən dirçəlməsi həm də xalqımızın öz tarixinə, mədəniyyətinə və milli dəyərlərinə bağlılığının göstəricisidir. 25 Oktyabr bizim üçün azadlığın qiymətini anlamaq, şəhidlərimizi ehtiramla yad etmək və doğma torpaqlarımızın gələcəyi naminə birlik nümayiş etdirmək günüdür.
Sevinc İsmayılova,
YAP Xəzər rayon təşkilatının fəalı
