Qazilərimiz – qəhrəmanlığın canlı nümunəsi
Azərbaycanın tarixi Zəfərinin əldə olunmasında qəhrəman əsgər və zabitlərimizin, xüsusilə də döyüşlərdə yaralanaraq sağlamlığını itirmiş qazilərimizin böyük xidmətləri vardır. Onlar Vətən uğrunda mübarizədə öz canlarını təhlükəyə ataraq xalqımızın azadlıq və qələbə arzusunun gerçəkləşməsinə töhfə veriblər. Bu gün qazilərimiz qəhrəmanlığın, dözümlülüyün və Vətənə sədaqətin canlı nümunəsi kimi cəmiyyətimizdə xüsusi ehtiramla qarşılanırlar.
Vətən müharibəsi zamanı Azərbaycan Ordusunun hər bir hərbçisi qarşıya qoyulan vəzifələrin icrası üçün böyük fədakarlıq göstərdi. Döyüş meydanında yaralanan hərbçilərimiz ağır sınaqlardan keçsələr də, onların ruh yüksəkliyi və Vətənə bağlılığı sarsılmadı. Qazilərimizin həyat yolu gənc nəsil üçün əsl vətənpərvərlik dərsidir.
Prezident İlham Əliyevin rəhbərliyi ilə şəhid ailələrinin və müharibə iştirakçılarının sosial müdafiəsinin gücləndirilməsi dövlət siyasətinin mühüm istiqamətlərindən birinə çevrilmişdir. Qazilərin tibbi və sosial reabilitasiyası, məşğulluğunun təmin olunması, mənzil və digər sosial məsələlərinin həlli istiqamətində proqramlar həyata keçirilir. Bu tədbirlər dövlətin öz qəhrəmanlarına olan diqqət və qayğısının göstəricisidir.
Qazilərə münasibət yalnız dövlət qurumlarının deyil, bütün cəmiyyətin məsuliyyətidir. Onların gündəlik həyatına dəstək olmaq, qarşılaşdıqları çətinliklərin həllinə kömək etmək, ictimai mühitdə onlara hörmət və diqqət göstərmək hər bir vətəndaşın mənəvi borcudur. Qazilərimizin cəmiyyətə inteqrasiyası və fəal həyat mövqeyinin dəstəklənməsi ümumi məqsədimiz olmalıdır.
Zəfər Günü qeyd edilərkən qazilərimizin fədakarlığı xüsusi minnətdarlıqla xatırlanır. Onlar öz sağlamlıqları bahasına Azərbaycanın şərəfini və torpaqlarının azadlığını müdafiə ediblər. Qazilərimizə ehtiram göstərmək, onların qəhrəmanlığını gələcək nəsillərə çatdırmaq Zəfər tariximizə və milli dəyərlərimizə sədaqətin ifadəsidir.
Ülkər Məmmədova,
YAP Nizami rayon təşkilatının “Azər Manafov küçəsi, 130” ərazi partiya təşkilatının sədr müavini
