Azərbaycan Respublikasının müasir tarixində 15 İyun xüsusi əhəmiyyət kəsb edən bir gündür. Bu gün ölkənin siyasi və ictimai həyatında dönüş nöqtəsi olan, dövlətçiliyin xilası və müstəqilliyin möhkəmləndirilməsi istiqamətində mühüm addımların atıldığı gündür. Məhz bu səbəbdən 15 iyun hər il “Milli Qurtuluş Günü” kimi qeyd olunur. 1991-ci ildə müstəqilliyini bərpa etmiş Azərbaycan Respublikası ilk illərində ciddi siyasi, iqtisadi və sosial böhranla üz-üzə qalmışdı. Həm daxili çəkişmələr, həm də Ermənistanla davam edən Qarabağ müharibəsi vəziyyəti daha da ağırlaşdırırdı. 1993-cü ilin yay aylarında isə ölkə bir vətəndaş müharibəsi təhlükəsi ilə qarşı-qarşıya idi. Gəncədə baş verən qiyam və mərkəzi hakimiyyətin zəifləməsi ölkəni xaosa sürükləyirdi.Belə bir gərgin və təhlükəli vəziyyətdə xalqın təkidli tələbi ilə ümummilli lider Heydər Əliyev iyunun 9-da Naxçıvandan Bakıya dəvət olundu və iyunun 15-də Azərbaycan Respublikası Ali Sovetinin sədri seçildi. Bu tarixi hadisə ölkədə sabitliyin bərpası, dövlətçiliyin qorunması və müstəqilliyin möhkəmləndirilməsi yolunda həlledici rol oynadı.Heydər Əliyevin siyasi hakimiyyətə qayıdışı Azərbaycan tarixində yeni bir mərhələnin başlanğıcı oldu. O, qısa müddət ərzində ölkədə nizam-intizam yaratdı, separatizmin qarşısını aldı və iqtisadi islahatlara start verdi. Onun uzaqgörən siyasəti nəticəsində Azərbaycan beynəlxalq arenada tanınmağa başladı, xarici investisiyalar cəlb edildi və neft strategiyası həyata keçirildi. Milli Qurtuluş Günü təkcə bir tarixi xatırlatma deyil, həm də milli həmrəyliyin və dövlətçilik ideyalarının təntənəsi kimi qəbul edilir. Bu gün Azərbaycanda sabitliyin və inkişafın təməlini qoyan liderin xalq iradəsi ilə yenidən hakimiyyətə gətirilməsinin rəmzidir. Bu tarix həm də Azərbaycanın müstəqil dövlət kimi mövcudluğunu qoruyub saxlamasında mühüm rol oynayan xalq-lider birliyinin bariz nümunəsidir. 15 İyun – Milli Qurtuluş Günü Azərbaycanın dövlətçilik tarixində silinməz izlər buraxmış bir gündür. Bu gün müstəqil Azərbaycanın dirçəlişi, sabitliyi və inkişafının başlanğıc nöqtəsi kimi xalqın yaddaşında əbədi yaşayacaq. Hər il bu gün qeyd olunmaqla həm tarixə hörmət göstərilir, həm də gələcək nəsillərə vətənə sədaqət və dövlətə bağlılıq aşılanır.
Murad Zeynalov
Yeni Azərbaycan Partiyası,Məsləhətçi
