Aprelin 2-də Almaniya Federativ Respublikasının Prezidenti Frank-Valter Ştaynmayerin Azərbaycana ilk rəsmi səfəri baş tutdu. Azərbaycan Respublikasının Prezidenti İlham Əliyevlə keçirdiyi görüşlər çərçivəsində iki ölkə arasında münasibətlərin geniş spektrdə inkişaf etdirilməsi müzakirə olundu.
Prezident İlham Əliyev mətbuata verdiyi bəyanatında səfərin Azərbaycan-Almaniya əlaqələrinə yeni müsbət təkan verəcəyini vurğuladı. Görüşlər zamanı iqtisadi əməkdaşlıq, xüsusilə enerji sahəsində qarşılıqlı layihələrin önəmi qeyd edildi. Bildirildi ki, 2024-cü ilin ilk iki ayında iki ölkə arasında ticarət dövriyyəsi təxminən üç dəfə artıb. Bu artımın əsas səbəbi Azərbaycandan Almaniyaya ixrac olunan xam neftin həcminin yüksəlməsi olub.
İki ölkə arasında enerji sahəsində əməkdaşlığın əsas prioritetlərindən biri də bərpaolunan enerji layihələridir. Prezident İlham Əliyev bildirib ki, Azərbaycan 2030-cu ilə qədər 6 giqavat gücündə yaşıl enerji istehsalını hədəfləyir və bu enerjinin bir hissəsi Avropaya ixrac ediləcək. Bu istiqamətdə Almaniya şirkətlərinin təcrübəsi yüksək qiymətləndirilir.
Görüşlər zamanı COP29 beynəlxalq iqlim konfransı da xüsusi vurğulandı. Prezident Əliyev Azərbaycanın ev sahibliyi etdiyi bu konfransın uğurla keçdiyini, 77 mindən çox iştirakçının tədbirdə yer aldığını qeyd etdi. Təəssüf hissi ilə bildirildi ki, bu konfransda iştirak etməyən yeganə ölkə Ermənistan olub.
Prezident İlham Əliyev, həmçinin Ermənistanla münasibətlərin normallaşması prosesində müsbət dinamikanın müşahidə edildiyini və sülhün əldə olunmasının real göründüyünü bildirdi. Azərbaycanın 30 il davam edən işğal və etnik təmizləmə nəticəsində üzləşdiyi çətinliklər, eləcə də ölkəmizin öz ərazi bütövlüyünü bərpa etməsi də bəyanatda önəmli yer aldı.
Almaniya və Azərbaycan arasında diplomatik münasibətlər 1992-ci ildə qurulub. Bu dövrdə dövlət başçılarının, nazirlərin və parlament nümayəndələrinin çoxsaylı qarşılıqlı səfərləri həyata keçirilib. İki ölkə arasında 77-dən çox sənəd imzalanıb, Alman-Azərbaycan Xarici Ticarət Palatası fəaliyyət göstərir.
Frank-Valter Ştaynmayerin bu səfəri Bakı ilə Berlin arasında siyasi, iqtisadi və humanitar sahələrdə əməkdaşlığın daha da dərinləşəcəyindən xəbər verir.
Bakıxanov qəsəbəsi, 96 nömrəli tam orta məktəbin direktoru,
Mehriban Hacıyeva
