Azərbaycan Respublikasının Prezidenti İlham Əliyevin yerli televiziya kanallarına verdiyi son müsahibə təkcə görülən işlərin hesabatı deyil, eyni zamanda dövlətin gələcək yol xəritəsini aydın şəkildə ortaya qoyan siyasi və strateji çıxış kimi yadda qaldı. Bu müsahibə bir daha göstərdi ki, Azərbaycan hazırda sabitlik, təhlükəsizlik və davamlı inkişaf mərhələsindədir və bu proses təsadüfi deyil, ardıcıl dövlət siyasətinin nəticəsidir. Prezident müsahibə boyunca həm daxili auditoriyaya, həm də beynəlxalq ictimaiyyətə ünvanlanan mühüm mesajlar verdi. Söhbətin əsas xəttini Azərbaycanın müstəqil siyasəti, milli maraqlara əsaslanan qərarları və regionda formalaşan yeni reallıqlar təşkil etdi. Prezident İlham Əliyev çıxışında Azərbaycanın bu gün regionun ən təhlükəsiz və sabit ölkələrindən biri olduğunu xüsusi vurğuladı. Onun sözlərinə görə, təhlükəsizlik yalnız hərbi güclə deyil, düzgün siyasi qərarlar, güclü iqtisadiyyat və xalq–dövlət birliyi ilə təmin olunur.
Məhz bu amillər Azərbaycana mürəkkəb geosiyasi şəraitdə belə öz mövqeyini qoruyub saxlamağa imkan verir. Dövlət başçısı qeyd etdi ki, ölkənin təhlükəsizliyi artıq müzakirə mövzusu deyil – bu, təmin olunmuş reallıqdır. Azərbaycan öz sərhədlərini, suverenliyini və milli maraqlarını qorumağa qadirdir və bunu real addımlarla sübut edib. Müsahibədə xüsusi yer tutan mövzulardan biri regionda sülhün təmin olunması idi. Prezident açıq şəkildə bildirdi ki, Azərbaycan müharibə yox, sülh istəyən dövlətdir. Lakin bu sülh yalnız ədalətə, qarşılıqlı hörmətə və beynəlxalq hüquqa əsaslanmalıdır. İlham Əliyev vurğuladı ki, regionda yaranmış yeni reallıqlar artıq dəyişməzdir və bu reallıqların qəbul edilməsi davamlı sülhün əsas şərtidir. Azərbaycan güc yolu ilə deyil, siyasi iradə və diplomatik mövqe ilə öz haqlı mövqeyini möhkəmləndirib. Prezidentin müsahibəsində diqqət çəkən məqamlardan biri də Azərbaycanın heç bir güc mərkəzindən asılı olmayan müstəqil xarici siyasət yürütməsidir.
Dövlət başçısı bildirdi ki, Azərbaycan bütün ölkələrlə bərabərhüquqlu münasibətlər qurur, lakin heç vaxt öz milli maraqlarını güzəştə getmir. Bu siyasətin nəticəsi olaraq Azərbaycan bu gün beynəlxalq arenada etibarlı tərəfdaş, sözünün sahibi olan dövlət kimi qəbul edilir. Ölkəmizin təşəbbüsü ilə reallaşan enerji, nəqliyyat və regional əməkdaşlıq layihələri Azərbaycanın geosiyasi əhəmiyyətini daha da artırır. Prezident İlham Əliyev iqtisadi məsələlərə toxunarkən vurğuladı ki, iqtisadi inkişafın əsas məqsədi rəqəmlər yox, insan həyatının yaxşılaşdırılmasıdır. Dövlət siyasətinin mərkəzində vətəndaş dayanır. Sosial layihələrin icrası, infrastrukturun yenilənməsi, bölgələrin inkişafı və məşğulluğun artırılması bu siyasətin əsas istiqamətləridir. Prezident qeyd etdi ki, əldə olunan iqtisadi nailiyyətlər məhz sosial rifaha çevrilməlidir və çevrilir. Müsahibədə Qarabağ və Şərqi Zəngəzur mövzusu xüsusi önəm daşıdı. Prezident bildirdi ki, bu torpaqlarda aparılan bərpa və quruculuq işləri sadəcə tikinti prosesi deyil, yeni həyatın qurulmasıdır. “Böyük Qayıdış” proqramı mərhələli şəkildə həyata keçirilir və məqsəd insanların doğma torpaqlarına təhlükəsiz, ləyaqətli və rahat şəkildə qayıtmasını təmin etməkdir.
Qarabağ artıq yalnız keçmişin deyil, gələcəyin də simvoludur. Prezident İlham Əliyevin müsahibəsi eyni zamanda cəmiyyətə ünvanlanan bir çağırış idi. Bu çağırış inam, birlik və məsuliyyət çağırışıdır. Dövlət başçısı açıq şəkildə göstərdi ki, Azərbaycan qarşısında böyük hədəflər var və bu hədəflərə yalnız birlikdə nail olmaq mümkündür. Prezidentin yerli televiziya kanallarına verdiyi bu müsahibə sadəcə müsahibə deyil, dövlətin bu gününü və sabahını izah edən strateji manifestdir. Burada həm görülən işlərin nəticəsi, həm də qarşıdakı illərin prioritetləri aydın şəkildə ortaya qoyuldu. Bu müsahibə bir daha sübut etdi ki, Azərbaycan güclü dövlətdir, mövqeyi bəllidir və gələcəyə inamla addımlayır.
Günel Əbdürəhmanova,
Yeni Azərbaycan Partiyası, məsləhətçi
