2025-ci ilin 21 aprel tarixində Azərbaycan Respublikasının Prezidenti cənab İlham Əliyev Çin Xalq Respublikasının aparıcı media qurumu olan “Sinxua” agentliyinə geniş və məzmunlu bir müsahibə verdi. Bu müsahibə, sadəcə iki ölkə arasında diplomatik münasibətlərin təqdimatı olmaqla kifayətlənməyib, eyni zamanda regional və qlobal səviyyədə strateji əməkdaşlıq perspektivlərinin konturlarını da cızdı. Prezident İlham Əliyev çıxışı zamanı Azərbaycan ilə Çin arasında münasibətlərin yüksək səviyyədə olduğunu vurğuladı. O, bu münasibətlərin əsasında səmimi dostluq, qarşılıqlı hörmət və suverenlik prinsipinə sadiqlik kimi dəyərlərin dayandığını qeyd etdi. Azərbaycanın daim “Bir Çin” siyasətini dəstəklədiyini xatırladan dövlət başçısı, beynəlxalq hüququn aliliyinə olan sadiqliyini də bir daha bəyan etdi. Bu yanaşma, Azərbaycanın beynəlxalq aləmdə sülhə, sabitliyə və ədalətə verdiyi əhəmiyyətin təzahürüdür. İlham Əliyevin çıxışından hiss olunurdu ki, bu münasibətlər yalnız siyasi yox, həm də mədəni, iqtisadi və texnoloji sahələrdə yeni imkanlar yaradır. Prezident müsahibəsində Azərbaycanın “Bir Kəmər, Bir Yol” təşəbbüsünə verdiyi dəstəyi xüsusi vurğuladı. Bu təşəbbüs, Avrasiyanın şərqindən qərbinə qədər ticarət yollarının canlandırılması və xalqlar arasında iqtisadi inteqrasiyanın gücləndirilməsi məqsədi daşıyır. İlham Əliyev qeyd etdi ki, Azərbaycanın geostrateji mövqeyi bu layihədə mühüm tranzit rolu oynayır. Bakı-Tbilisi-Qars dəmir yolu, Ələt Beynəlxalq Dəniz Ticarət Limanı və digər nəqliyyat-logistika layihələri Azərbaycanın bu təşəbbüsdəki iştirakını daha da gücləndirir. Bu, təkcə Azərbaycan üçün deyil, həm də Çin, Mərkəzi Asiya, Cənubi Qafqaz və Avropa üçün iqtisadi sabitlik və davamlı inkişafın təminatıdır.
Prezident İlham Əliyevin çıxışında diqqətçəkən əsas məsələlərdən biri də yaşıl enerji idi. O, Azərbaycanın 2030-cu ilə qədər alternativ enerji sahəsində böyük hədəflər qoyduğunu və Çinlə bu sahədə əməkdaşlığa açıq olduğunu bildirdi. Xüsusilə günəş və külək enerjisi sahəsində Çin texnologiyasının Azərbaycana gətirilməsi, bu əməkdaşlığın ekoloji baxımdan nə qədər strateji əhəmiyyətə malik olduğunu göstərir. Azərbaycanın enerji keçidi sahəsində atdığı addımlar regionda iqlim dəyişikliyi ilə mübarizədə nümunə göstərilə bilər. Bu, həm də Azərbaycanın COP29 kimi beynəlxalq tədbirlərə ev sahibliyi etməsi fonunda olduqca aktuallaşır. Prezident İlham Əliyev müsahibədə Azərbaycanın ərazi bütövlüyünün bərpasını və bu prosesin beynəlxalq hüquqa əsaslandığını xüsusi olaraq qeyd etdi. O bildirdi ki, beynəlxalq münasibətlərdə ədalət və hüquq aliliyi bərqərar olmadıqca, davamlı sülh mümkün deyil. Azərbaycanın 44 günlük Vətən müharibəsində əldə etdiyi Zəfər təkcə hərbi yox, həm də diplomatik uğur idi. Bu uğur, eyni zamanda beynəlxalq ictimaiyyətə bir mesaj idi: hüquq əsaslı dünya nizamı mümkündür və buna nail olmaq üçün siyasi iradə yetərlidir. İlham Əliyevin “Sinxua” agentliyinə verdiyi müsahibə, Azərbaycan-Çin münasibətlərinin artıq daha yüksək və strateji mərhələyə keçdiyini göstərdi. Bu müsahibə bir daha təsdiqlədi ki, Azərbaycan öz müstəqil siyasətini davam etdirərək, həm regional, həm də qlobal əməkdaşlığa açıq və etibarlı tərəfdaş olaraq fəaliyyət göstərir. Bu siyasi dialoq sadəcə iki dövlətin münasibətlərinin möhkəmləndirilməsi deyil, həm də Avrasiya məkanında yeni bir inteqrasiya modelinin formalaşması üçün zəmin yaradır. İlham Əliyevin vizyonu Azərbaycanı yalnız Cənubi Qafqazın deyil, bütün Avrasiyanın strateji oyunçularından birinə çevirir.
Günel Əbdürəhmanova,
Yeni Azərbaycan Partiyası, məsləhətçi
