Azərbaycan və Gürcüstan arasında əlaqələr əsrlərin sınağından çıxmış dostluq və mehriban qonşuluq prinsiplərinə əsaslanır. Bu münasibətlər hazırda strateji tərəfdaşlıq səviyyəsinə çataraq müxtəlif sahələrdə əməkdaşlıq üçün geniş imkanlar yaradıb. İki ölkənin əlaqələrinin təhlili göstərir ki, siyasi, iqtisadi, enerji və nəqliyyat sahələrindəki əməkdaşlıq regional və beynəlxalq əhəmiyyətə malikdir. Gürcüstan Baş naziri İrakli Kobaxidzenin 2025-ci ilin yanvarında Azərbaycana səfəri xüsusi əhəmiyyət kəsb edir. Bu səfər, Gürcüstanda keçirilmiş parlament seçkilərindən sonra ilk xarici səfər olaraq, Azərbaycan-Gürcüstan münasibətlərinin yüksək səviyyədə olduğunu bir daha nümayiş etdirir. Bu cür səfərlər iki ölkə arasında siyasi dialoqun daha da dərinləşməsinə və əməkdaşlığın yeni mərhələyə yüksəlməsinə zəmin yaradır.
Azərbaycan və Gürcüstan arasındakı siyasi əməkdaşlıq, regionun təhlükəsizliyi və inkişafı üçün mühüm əhəmiyyət daşıyır. İqtisadi sahədə də ölkələr arasında uğurlu nəticələr müşahidə olunur. Azərbaycan, Gürcüstan iqtisadiyyatına 3,6 milyard dollar sərmayə qoyaraq, bu sahədə mühüm tərəfdaş rolunu oynayır. Hər iki ölkədə müsbət sərmayə iqliminin mövcudluğu qarşılıqlı iqtisadi əlaqələrin daha da inkişaf etməsinə şərait yaradır. Azərbaycan və Gürcüstan arasında enerji sahəsində əməkdaşlıq, regionun və daha geniş coğrafiyanın enerji təhlükəsizliyinin təmin edilməsində mühüm rol oynayır. Bakı-Tbilisi-Ceyhan və Cənub Qaz Dəhlizi layihələri Avropanın enerji təhlükəsizliyinə töhfə verir. Eyni zamanda, Bakı-Tbilisi-Qars dəmiryolu layihəsi Şərq-Qərb arasında strateji bağlantı təmin edir.
Nəqliyyat sahəsində Orta Dəhliz layihəsi hər iki ölkə üçün əhəmiyyətlidir. Bu layihə vasitəsilə Azərbaycan və Gürcüstan, Avropa ilə Asiya arasında nəqliyyat-logistika əlaqələrini gücləndirir. Azərbaycan və Gürcüstan arasındakı mədəni-humanitar əməkdaşlıq, xalqlar arasında dostluq əlaqələrinin güclənməsinə səbəb olur. Bu sahədə birgə layihələr, qarşılıqlı səfərlər və tədbirlər mühüm rol oynayır. İki ölkə, beynəlxalq təşkilatlar çərçivəsində də bir-birinə dəstək göstərir. BMT, ATƏT, GUAM kimi təşkilatlarda Azərbaycanın və Gürcüstanın əməkdaşlığı, milli maraqların qorunmasında əhəmiyyətli rol oynayır.
Azərbaycan və Gürcüstan arasındakı dostluq və əməkdaşlıq əlaqələri strateji tərəfdaşlıq səviyyəsinə yüksələrək, regionun inkişafına mühüm töhfələr verir. Enerji, nəqliyyat, iqtisadi və siyasi sahələrdə həyata keçirilən birgə layihələr, bu əməkdaşlığın gələcəkdə də uğurla davam edəcəyinə əminlik yaradır. İki ölkə arasında qarşılıqlı etimad və dəstək, münasibətlərin daha da möhkəmlənməsini təmin edir.
Xəyalə Allahverdiyeva,
Xəzər rayonu, 185 nömrəli tam orta məktəbin müəllimi.
