Müasir dünyada multikultural dəyərlərin və dinlərarası dialoqun ən mühüm mərkəzlərindən birinə çevrilmiş Azərbaycan, beynəlxalq həmrəyliyə xidmət edən mötəbər tədbirlərə uğurla ev sahibliyi edir. Sentyabrın 15-də Azərbaycan Respublikasının Prezidenti İlham Əliyevin rəhbərliyi ilə keçirilən növbəti tarixi qəbul ölkəmizin bu istiqamətdəki qətiyyətli mövqeyini bir daha nümayiş etdirdi. Dövlət başçısı Türk Dövlətləri Təşkilatının (TDT) Müsəlman Dini Rəhbərləri Şurasının 7-ci toplantısı, Yəhya Bakuvi Beynəlxalq Konfransının həmtəşkilatçıları və Qafqaz Xalqları Ali Dini Şurasının üzvlərindən ibarət nümayəndə heyətini qəbul edərək, İslam və Türk dünyasının mənəvi rəhbərlərini bir araya gətirdi. Türkiyə, Özbəkistan, Qazaxıstan kimi qardaş dövlətlərin və Şimali Qafqaz respublikalarının ali dini liderlərinin iştirak etdiyi bu görüş, Prezident İlham Əliyevin qlobal sülh və ümmət birliyi naminə həyata keçirdiyi məqsədyönlü siyasətin bariz təcəssümü oldu.
Görüş zamanı dövlət başçısı Azərbaycanın zəngin intellektual və mənəvi irsinə diqqət çəkərək, xalqımızın bəşəriyyətə bəxş etdiyi dahi mütəfəkkirlərdən qürurla bəhs etdi. Prezident İlham Əliyev TDT-nin dini rəhbərlərinin toplantısı ilə eyni günlərdə Seyid Yəhya Bakuviyə həsr olunmuş beynəlxalq konfransın keçirilməsinin rəmzi mənasına toxundu. Nizami Gəncəvi, İmadəddin Nəsimi, Şah İsmayıl Xətai və Məhəmməd Füzuli kimi dahilərin irsinin təkcə ölkəmiz üçün deyil, bütün İslam dünyası üçün böyük mənəvi xəzinə olduğunu vurğulayan dövlət başçısı, həmçinin Qafqaz Albaniyasının Qəbələ və Atabəylər dövlətinin Naxçıvan şəhərlərinin tarixi rolunu xatırlatdı. O bildirdi ki, TDT daxilində yeganə Qafqaz ölkəsi olan Azərbaycan, əsrlər boyu Türk dünyası ilə Qafqaz coğrafiyasını bir-birinə bağlayan sarsılmaz bir vəhdət mərkəzi olmuşdur və bu gün də bu missiyanı uğurla davam etdirir.
İslam aləmində baş verən ictimai-siyasi çağırışlara münasibət bildirən Prezident İlham Əliyev müsəlman ümmətinin sarsılmaz həmrəyliyinin həyati əhəmiyyət kəsb etdiyini bəyan etdi. Dövlət başçısı dini liderlərin sülhə, əməkdaşlığa və barışığa xidmət edən çağırışlarının bölgədə əmin-amanlıq yaratmaq üçün mühüm amil olduğunu vurğuladı. Azərbaycanın İslam Əməkdaşlıq Təşkilatı daxilində hər zaman birləşdirici mövqedən çıxış etdiyini deyən Prezident, 2017-ci ildə Bakıda keçirilmiş IV İslam Həmrəylik Oyunlarının böyük qardaşlıq bayramı olduğunu xatırlatdı. O, gələn il ölkəmizdə keçiriləcək İƏT Zirvə Görüşünün müsəlman ölkələri arasındakı bəzi anlaşılmazlıqlara son qoyacağına və İslam dininə qarşı aparılan məkrli kampaniyaların qarşısını almaq üçün müsəlman aləmini vahid bir ailə kimi birləşdirəcəyinə böyük ümid bəslədiyini qeyd etdi.
Prezident İlham Əliyev qonaqların Qarabağa – Ağdam, Xankəndi, Xocalı və Şuşaya edəcəyi səfərin tarixi əhəmiyyətini xüsusi önə çəkdi. O, Ermənistanın 30 illik işğalı dövründə 65 məscidi yerlə-yeksan etməsini və müqəddəs inanc yerlərində heyvan saxlamasını bütün İslam dünyasına qarşı yönəlmiş misilsiz vəhşilik adlandırdı. Lakin qürurla qeyd etdi ki, güc amilinin həlledici olduğu müasir dünyada Azərbaycan xalqı Müzəffər Ordumuzun gücü ilə bu ədalətsizliyə son qoydu. Bu gün “Böyük Qayıdış” proqramı çərçivəsində 90 mindən çox vətəndaşın azad edilmiş torpaqlara qayıtması, Prezident İlham Əliyevin həm qurucu lider, həm də İslam dəyərlərinin qoruyucusu kimi sarsılmaz iradəsini və Azərbaycanın əbədi qələbəsini bütün dünyaya sübut edir.
Sona Bəylərli,
YAP Nizami rayon təşkilatının “Qara Qarayev prospekti, 84” ərazi partiya təşkilatının sədr müavini
