Azərbaycan xalqı hər il 9 noyabr tarixini Dövlət Bayrağı Günü kimi qürurla qeyd edir. Bu gün müstəqil dövlətimizin suverenliyini, milli birliyimizi və azadlıq ideallarımızı özündə əks etdirən əlamətdar tarixdir. Azərbaycan bayrağı təkcə dövlət rəmzi deyil, həm də xalqımızın mənəvi dəyərlərinin, milli kimliyinin və tarix boyu azadlıq uğrunda apardığı mübarizənin simvoludur.
Azərbaycan Xalq Cümhuriyyəti 1918-ci il noyabrın 9-da üçrəngli bayrağı qəbul etməklə müasir milli dövlətçilik ideyasının əsasını qoydu. Bu bayraq azərbaycançılıq məfkurəsinin ən mühüm ifadə vasitəsinə çevrildi. Bayrağın hər bir rəngi dərin mənəvi və ideoloji məna daşıyır. Mavi rəng türk mənşəyimizi, qırmızı rəng müasir inkişafı və demokratiya ideyalarını, yaşıl rəng isə İslam mədəniyyətinə mənsubiyyətimizi ifadə edir. Aypara və səkkizguşəli ulduz xalqımızın milli-mədəni kimliyini, tariximizə və mənəvi irsimizə sadiqliyini simvollaşdırır.
Bu bayraq bir əsrdən çoxdur ki, azərbaycanlıların qəlbində müstəqillik və azadlıq arzularının rəmzi kimi yaşayır. XX əsrin əvvəllərində yaranan Azərbaycan Xalq Cümhuriyyəti cəmi 23 ay mövcud olsa da, qəbul etdiyi üçrəngli bayraq sonrakı nəsillərə milli mübarizə və dövlətçilik irsi kimi ötürüldü. Sovet hakimiyyəti illərində bu bayraq qadağan olunsa da, xalqın yaddaşından silinmədi, azadlıq düşüncəsinin bir parçası kimi qorundu.
1991-ci ildə Azərbaycan Respublikası müstəqilliyini bərpa etdikdən sonra üçrəngli bayraq yenidən dövlət rəmzi statusu aldı. Ulu Öndər Heydər Əliyev bu bayrağı xalqımızın qürur mənbəyi kimi dəyərləndirərək qeyd etmişdi ki, “bu bayraq bizim dövlətimizin, müstəqilliyimizin, milli qürurumuzun rəmzidir.” Həmin dövrdən etibarən Azərbaycan bayrağı bütün dövlət idarələrinin, beynəlxalq təşkilatların qarşısında, diplomatik nümayəndəliklərdə və vətənin hər bir guşəsində ucalarda dalğalanmağa başladı.
Müasir dövrdə Prezident İlham Əliyevin rəhbərliyi ilə Azərbaycan dövləti üçrəngli bayrağa olan hörməti və dəyəri daha da yüksəltdi. Dövlət Bayrağı Meydanının inşası, bayraq muzeylərinin yaradılması, həmçinin bu günün rəsmi dövlət bayramı kimi qeyd olunması bayrağa verilən ali ehtiramın bariz nümunəsidir. Ən önəmlisi isə 2020-ci ildə 44 günlük Vətən müharibəsində qazanılan Zəfərdən sonra üçrəngli bayrağımızın Şuşada, Cəbrayılda, Füzulidə, Laçında, Xankəndidə və bütün azad edilmiş torpaqlarda dalğalanması oldu. Bu, xalqın tarixi ədaləti bərpa etməsinin, milli birliyinin və dövlətimizin gücünün təntənəsi idi.
Bu gün üçrəngli bayraq hər bir vətəndaşın qəlbində iftixar və məsuliyyət hissi yaradır. Bayrağa ehtiram göstərmək, onu qorumaq və yüksəklərdə dalğalandırmaq hər bir azərbaycanlının müqəddəs borcudur. Bu bayraq bizim kimliyimizi, tarixi davamlılığımızı və gələcəyə inamımızı ifadə edir. O, keçmişin ağrı-acılarını, bu günün qürurunu və sabahın ümidini özündə birləşdirən müqəddəs dəyərdir.
Azərbaycan bayrağı bu gün dünyanın bir çox ölkələrində dalğalanır. Diplomatik nümayəndəliklərdə, beynəlxalq idman arenalarında, elmi konfranslarda və mədəni tədbirlərdə üçrəngli bayrağımızın qaldırılması Azərbaycanın nüfuzunun, suverenliyinin və qlobal arenada artan rolunun göstəricisidir. Hər dəfə bu bayraq qaldırıldıqda, təkcə bir dövlətin deyil, bütün azərbaycanlıların qüruru və birliyi nümayiş olunur.
Bayraq Günü həm də milli kimliyimizi qorumaq, gənc nəsildə vətənpərvərlik ruhunu gücləndirmək üçün mühüm ideoloji məna daşıyır. Bu gün məktəblərdə, ali təhsil ocaqlarında və dövlət tədbirlərində bayrağa həsr olunmuş tədbirlərin keçirilməsi gənclərin milli dəyərlərə bağlılığını daha da möhkəmləndirir. Üçrəngli bayrağımızın hər bir evdə, hər bir ürəkdə ucalarda olması Azərbaycanın gələcəyi üçün ən böyük zəmanətdir.
Bu bayraq bizim milli yaddaşımızın və dövlətçilik iradəmizin rəmzidir. O, həm keçmiş nəsillərin qəhrəmanlıq salnaməsini, həm də gələcək nəsillərin məsuliyyətini xatırladır. Hər bir azərbaycanlı bilməlidir ki, bayrağın ucalığı dövlətin qüdrəti, xalqın birliyi və vətənə sədaqəti ilə ölçülür.
Azərbaycanın Dövlət Bayrağı bu gün qürurla dalğalanır və onun hər bir hərəkətində azadlıq nəfəsi, müstəqillik qüruru və milli iradə hiss olunur. Bu bayraq daim ucalarda dalğalansın – çünki o, bizim varlığımızın, müstəqil dövlətimizin və əbədi azadlığımızın rəmzidir.
Vaqif Vəlibəyli,
YAP Nizami rayon təşkilatının könüllüsü
