Füzuli şəhərinin azad olunması Azərbaycan xalqının uzun illər davam edən mübarizəsinin mühüm nəticələrindən biri oldu. 2020-ci il oktyabrın 17-də baş verən bu tarixi hadisə Prezident İlham Əliyevin rəhbərliyi altında ölkəmizin ərazi bütövlüyünün bərpasına doğru atılan qətiyyətli addım idi. Qələbə xalqın gələcəyə inamını gücləndirdi və yeni inkişaf mərhələsinin əsasını qoydu.
Füzuli istiqamətində aparılan hərbi əməliyyatlar Azərbaycan Ordusunun hazırlığını, cəsarətini və döyüş əzmini nümayiş etdirdi. Uzun illər möhkəmləndirilmiş müdafiə mövqelərinin yarılması ciddi peşəkarlıq tələb edirdi. Əsgər və zabitlərimizin fədakarlığı nəticəsində şəhərin azad edilməsi cəbhənin cənub istiqamətində hərbi üstünlüyün genişlənməsinə kömək etdi.
Qələbədən sonra dövlətin qarşısında yeni vəzifələr meydana çıxdı. Dağıdılmış şəhərlərin yenidən qurulması, infrastrukturun bərpası və keçmiş məcburi köçkünlərin geri qayıdışı uzunmüddətli planlaşdırma tələb edirdi. Prezident İlham Əliyevin rəhbərliyi ilə Böyük Qayıdış siyasəti çərçivəsində Füzulidə yaşayış və sosial obyektlərin yaradılmasına başlanıldı.
Bu gün Füzuli şəhərində müasir yaşayış sahələri, yollar, təhsil müəssisələri və nəqliyyat infrastrukturu yaradılır. Füzuli Beynəlxalq Hava Limanı şəhərin regional əhəmiyyətini artırır. Baş planda nəzərdə tutulan inkişaf hədəfləri isə Füzulinin gələcəkdə daha geniş əhali və iqtisadi fəaliyyət imkanlarına malik müasir şəhərə çevrilməsini nəzərdə tutur.
Füzuli Şəhəri Günü xalqımızın həm keçmiş qələbələrinə, həm də gələcək hədəflərinə nəzər salmaq üçün mühüm fürsətdir. Prezident İlham Əliyevin rəhbərliyi ilə əldə edilən hərbi qələbə bu gün quruculuq və inkişafla davam edir. Füzulinin dirçəlişi Azərbaycanın öz gücünə, birliyinə və gələcəyinə olan inamının parlaq ifadəsidir.
Regina Kovalyova,
YAP Nizami rayon təşkilatının fəalı
