Müasir dövrdə informasiya mübadiləsi milli sərhədləri aşaraq, dünyəvi bir məzmuna çevrilmişdir. Azərbaycan mətbuatı da bu qlobal informasiya axınının fəal iştirakçısıdır. Yerli media qurumları dünya ilə ayaqlaşmağa, beynəlxalq jurnalistika standartlarına uyğun fəaliyyət göstərməyə çalışır. İnformasiya texnologiyalarının sürətli inkişafı ilə, Azərbaycanın media orqanları yalnız ölkə daxilində deyil, həm də qlobal səviyyədə səs qazanmaq imkanı əldə etmişlər.
Xüsusilə onlayn platformaların güclənməsi Azərbaycan mediasına beynəlxalq auditoriyaya çıxış imkanı vermişdir. Xəbər portalları, xəbər agentlikləri və sosial media üzərindən yayımlanan məlumatlar ölkənin mövqeyinin, siyasətinin və mədəniyyətinin dünyaya çatdırılmasında mühüm rol oynayır. Azərbaycan mətbuatı beynəlxalq mövzularda operativ reaksiya verməklə informasiya savaşlarında da aktiv rol oynayır.
Eyni zamanda, beynəlxalq jurnalist təşkilatları ilə əməkdaşlıq, xarici dillərdə yayımlanan nəşrlər və xaricdə fəaliyyət göstərən media platformaları vasitəsilə Azərbaycanın informasiya cəbhəsindəki təsiri artır. Mətbuatımız həm milli maraqları müdafiə edir, həm də dünya ictimaiyyətini obyektiv şəkildə məlumatlandırmağa çalışır. Bu, xüsusilə Qarabağ münaqişəsi və onun nəticələrinin dünyaya çatdırılmasında açıq şəkildə özünü göstərmişdir.
Beləliklə, Azərbaycan mətbuatı təkcə yerli informasiyanın daşıyıcısı deyil, həm də beynəlxalq informasiya şəbəkəsində özünəməxsus mövqeyə sahibdir. O, həm informasiya istehsalçısı, həm də qlobal informasiya dövriyyəsinin məsul iştirakçısıdır.
Ağadadaş Həsənalıyev
YAP Xəzər rayon təşkilatının fəalı
