Müstəqil dövlətin beynəlxalq münasibətlər sistemində iştirakı onun suverenliyinin və siyasi müstəqilliyinin mühüm göstəricisidir. Azərbaycan Respublikasının Konstitusiyası ölkənin beynəlxalq hüququn ümumtanınmış prinsiplərinə əsaslanan xarici siyasət fəaliyyətinin hüquqi çərçivəsini müəyyən edir. Bu sənəd Azərbaycanın müstəqil dövlət kimi beynəlxalq aləmdə təmsil olunmasının əsaslarını təsbit edir.
1995-ci ildə Konstitusiyanın qəbul edilməsi Azərbaycanın beynəlxalq hüquqi statusunun möhkəmlənməsi baxımından mühüm mərhələ idi. Əsas Qanunda dövlət suverenliyi, ərazi bütövlüyü və beynəlxalq münasibətlərdə müstəqil fəaliyyət prinsipləri öz əksini tapdı. Bu müddəalar ölkənin xarici siyasət kursunun hüquqi əsaslarını gücləndirdi.
Azərbaycan müstəqillik illərində beynəlxalq təşkilatlarla əməkdaşlığını genişləndirmiş, müxtəlif dövlətlərlə siyasi, iqtisadi və humanitar əlaqələr qurmuşdur. Bu münasibətlər milli maraqlar, qarşılıqlı hörmət və beynəlxalq hüququn prinsipləri əsasında inkişaf etdirilmişdir. Ölkənin beynəlxalq mövqeyinin güclənməsi dövlət institutlarının möhkəmliyini də nümayiş etdirir.
Ərazi bütövlüyünün bərpası Azərbaycanın beynəlxalq münasibətlər sistemində mövqeyinə yeni məzmun qazandırdı. Ölkəmiz suveren hüquqlarını təmin etmək və azad edilmiş ərazilərdə hüquqi idarəetməni bərpa etmək istiqamətində mühüm addımlar atdı. Bu prosesdə Konstitusiyanın müəyyən etdiyi prinsiplər əsas hüquqi istiqamət rolunu oynayır.
Azərbaycanın beynəlxalq nüfuzunun davamlı şəkildə güclənməsi hüquqi dövlət quruculuğunun, siyasi sabitliyin və müstəqil xarici siyasətin nəticəsidir. Konstitusiya bu siyasətin fundamental hüquqi dayaqlarından biridir. Dövlətin beynəlxalq münasibətlərdə etibarlı tərəfdaş kimi çıxış etməsi onun daxili hüquqi sisteminin möhkəmliyi ilə də bağlıdır.
Nəzakət Bağırova,
YAP Nizami rayon təşkilatının “Əli Vəliyev küçəsi, 4” ərazi partiya təşkilatının sədr müavini
