26 İyun – Azərbaycan Respublikasının Silahlı Qüvvələr Günü xalqımızın suverenlik əzminin, milli təhlükəsizlik konsepsiyasının və dövlətçilik ənənələrinin ən ali təcəssümüdür. Müstəqilliyimizin ən etibarlı sipəri olan Azərbaycan Ordusu bu gün sıfırdan başlayaraq regionun ən qüdrətli hərbi qüvvəsinə çevrilmək kimi şanlı bir inkişaf yolu keçmişdir.
Bu gün Müzəffər Ali Baş Komandan İlham Əliyevin rəhbərliyi altında Azərbaycan Silahlı Qüvvələri tamamilə yeni – keyfiyyət və texnoloji inkişaf mərhələsinə qədəm qoydu. Məqsədyönlü siyasət nəticəsində dövlətin artan iqtisadi potensialı birbaşa müdafiə qabiliyyətinin gücləndirilməsinə istiqamətləndirildi. Ordunun maddi-texniki bazası ən son standartlara uyğunlaşdırıldı, şəxsi heyətin döyüş və mənəvi-psixoloji hazırlığı maksimum səviyyəyə çatdırıldı. Bununla da Azərbaycan Ordusu sadəcə müdafiə xarakterli bir qüvvə çərçivəsindən çıxaraq, istənilən strateji hədəfi məhv etməyə qadir olan innovativ, peşəkar və çevik bir hərbi qüvvəyə çevrildi.
Milli hərbi strategiyamızın ən böyük və şanlı imtahanı 2020-ci ildə Vətən müharibəsində verildi. Uzun illərin hazırlığı, səbri və intizamı öz bəhrəsini döyüş meydanında göstərdi. 44 günlük haqq savaşı Azərbaycan xalqının və ordusunun potensialını bütün dünyaya nümayiş etdirdi. Bu Zəfər həm siyasi, həm də diplomatik müstəvidə Azərbaycanın diktə edən tərəfə çevrilməsini təmin etdi.
Hazırda post-konflikt dövründə işğaldan azad edilmiş cənnət məkanlarımızda nəhəng bərpa və quruculuq işləri aparılır. Bununla paralel olaraq, milli təhlükəsizlik sistemimiz yeni dövrün çağırışlarına uyğun olaraq daha da möhkəmləndirilir. Çünki əldə edilmiş nailiyyətləri qorumaq, regionda sülhü və inkişafı təmin etmək üçün güclü ordunun varlığı həyati zərurətdir.
Aytac Məhərrəmli,
YAP Nizami rayon təşkilatının məsləhətçisi
