“Prezident İlham Əliyevin yerli televiziya kanallarına müsahibəsi bir çox mühüm ictimai və siyasi məqamlarla yadda qaldı. Dövlət başçısı Azərbaycanın daxili və xarici siyasətinin əsas prinsiplərini bir daha diqqətə çatdırmaqla yanaşı, ölkəmizlə əməkdaşlıq, yaxud çirkin rəqabət aparmaq niyyətində olanlara da lazımi mesajlarını verdi. Bütövlükdə, Prezident İlham Əliyevin müsahibəsi Azərbaycanın bu günü və gələcəyi ilə bağlı həm ölkə, həm də beynəlxalq ictimaiyyəti maraqlandıran suallara əhəmiyyətli dərəcədə cavab oldu”.
Bunu “Reportyorinfo.az”a açıqlamasında Yeni Azərbaycan Partiyası Nizami rayon təşkilatının sədri Ramil Vəlibəyov deyib.
Ramil Vəlibəyov bildirib ki, Prezident İlham Əliyev müsahibəsində Donald Trampın rəhbərlik edəcəyi ABŞ hakimiyyəti ilə mümkün isti münasibətlərdən Fransanın və Avropa təsisatlarının ölkəmizə qarşı nümayiş etdirdiyi qərəzinə qədər olan bütün məsələlərə də aydınlıq gətirdi: “Cənab İlham Əliyev müsahibəsində geosiyasi və geoiqtisadi məsələlərin təhlili verdi və bununla da hər kəs müasir qlobal nizamda Azərbaycanın yerini və rolunu aydın şəkildə görmək imkanını əldə etdi. Prezident İlham Əliyevin müsahibəsindəki fikirləri Azərbaycanın nəqliyyat-kommunikasiya qovşağına çevrilməsi, Avrasiyada enerji təhlükəsizliyinin təmin olunmasında açar dövlətə dönüşməsi, milli maraqlarını müdafiə etmək üçün Fransa kimi böyük dövlətlərlə belə baş-başa gələ bilməsi, qalib ölkə kimi vətəndaşlarının qürurla yaşadığı və fəxr etdiyi dövlət vəziyyətinə gəlməsi kimi reallıqların dərk olunmasına vəsilə oldu. Bir sözlə, Prezident İlham Əliyev son müsahibəsi ilə hər kəsdə dünyanın bu günü və gələcəyi, bu fonda isə Azərbaycanın yeri və rolu barədə aydın təsəvvürlər formalaşdırdı”.
“Prezident İlham Əliyevin müsahibəsində əsas xətti təşkil edən məqamlardan birini də məhz milli maraqların qorunması və milli təhlükəsizliyin təmin olunması məsələləri idi” – deyən Ramil Vəlibəyov əlavə edib ki, dövlət başçısı ölkəmizdə perspektiv təhdidlər üçün gənclər üzərindən müxtəlif platformaların yaradılmasına çalışan xarici qüvvələrin məkirli niyyətlərini də açıqladı: “Sirr deyil ki, belə bir məqamda “demokratiya”, “insan hüquqları”, “azad mətbuat” və başqa qulağa xoş gələn ifadə və söz birləşmələrini bəhanə gətirib, milyonlarla vəsaiti xəyanət yolunu tutmalı olan qrupların formalaşdırılmasına xərcləyən NED, EED kimi Qərbin “troya atları” da ifşalanmış olur. Məhz, bu təşkilatların maliyyəsi ilə bu gün Avropa şəhərlərində dislokasiya edilmiş təhqir müxalifətinin fəaliyyəti, eyni zamanda onların Azərbaycandakı radikal müxalifətin əməlləri ilə sinxronlaşdırılması, xor dərnəyinin üzvləri kimi birgə işləmələri bir daha onu deməyə əsas verir ki, sözügedən təhdid və xəyanət yolu mövcuddur və ona qarşı ictimai mübarizə daha da gücləndirilməlidir”.
