Azərbaycan Respublikasının Prezidenti Cənab İlham Əliyevin “Rossiya Seqodnya” Beynəlxalq İnformasiya Agentliyinə verdiyi müsahibə bir sıra vacib geosiyasi məsələlərin müzakirəsi və ölkənin regional siyasətinin əsas istiqamətlərinin müəyyənləşdirilməsi baxımından diqqətəlayiq hadisə oldu. Müsahibə zamanı Prezident Əliyev regional sabitlik, enerji təhlükəsizliyi, Ermənistanla münasibətlər, Zəngəzur dəhlizinin açılması və Azərbaycanın beynəlxalq platformalardakı mövqeləri ilə bağlı əhəmiyyətli mesajlar verdi. Dövlət başçımız müsahibəsində Azərbaycanın regional sülhün təminatına yönəlmiş siyasətini bir daha vurğuladı. O, Ermənistanla münasibətlərin normallaşdırılması istiqamətində atılan addımlara diqqət çəkərək, Azərbaycanın beynəlxalq hüquqa əsaslanan mövqeyini bir daha təsdiqlədi. Prezident, sülh müqaviləsinin bağlanmasının vacibliyini qeyd edərək, bunun bütün Cənubi Qafqaz üçün sabitliyin təmin olunmasında əsas faktor olduğunu bildirdi. Dünya enerji bazarında Azərbaycanın strateji roluna toxunan Prezident İlham Əliyev, ölkənin enerji ehtiyatlarının beynəlxalq bazarlara çıxarılması ilə bağlı təşəbbüsləri haqqında məlumat verdi. Xüsusilə, Cənub Qaz Dəhlizi layihəsinin uğurla icrası və Avropanın enerji təhlükəsizliyinə töhfələr Azərbaycanın qlobal enerji siyasətindəki əhəmiyyətini bir daha nümayiş etdirir. Prezident qeyd etdi ki, Azərbaycan enerji ixracını şaxələndirmək və tərəfdaş ölkələrlə qarşılıqlı faydalı əməkdaşlıq qurmaqda maraqlıdır. Prezident Cənab İlham Əliyev Zəngəzur dəhlizinin reallaşdırılmasının təkcə Azərbaycanın deyil, bütövlükdə regionun iqtisadi inkişafı üçün mühüm əhəmiyyət daşıdığını vurğuladı. O, bu dəhlizin açılmasının bölgədə iqtisadi əməkdaşlığın genişlənməsi və beynəlxalq nəqliyyat marşrutlarının inkişafı baxımından strateji önəm kəsb etdiyini bildirdi. Prezident Cənab İlham Əliyev Azərbaycanın beynəlxalq arenadakı mövqelərini də geniş şəkildə şərh etdi. O, ölkənin Qoşulmama Hərəkatındakı sədrliyi çərçivəsində irəli sürdüyü təşəbbüslər və humanitar sahədə həyata keçirilən layihələrlə bağlı fikirlərini bölüşdü. Həmçinin, Azərbaycanın müstəqil siyasətinə sadiqliyini və beynəlxalq təşkilatlarla konstruktiv əməkdaşlığa hazır olduğunu bəyan etdi. Dövlət başçımız “Rossiya Seqodnya” agentliyinə verdiyi müsahibə Azərbaycan Respublikasının strateji məqsədlərini, regional və qlobal məsələlərə dair prinsipial mövqeyini bir daha dünya ictimaiyyətinə təqdim etdi. Bu müsahibə, Azərbaycanın sülhsevər və konstruktiv siyasətinin, eyni zamanda, milli maraqlarını qorumaq istiqamətində qətiyyətli addımlar atmaq əzmində olduğunu bir daha təsdiq edir. Azərbaycanın gələcək hədəfləri, regional əməkdaşlıq və qlobal enerji təhlükəsizliyi sahəsində aparıcı rolu bu müsahibədə geniş şəkildə əksini tapdı.
Məmmədova Nərmin,
YAP-ın gənc fəalı
