Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Zirvə Görüşü beynəlxalq siyasətin diqqət mərkəzində yer alan mühüm hadisələrdən biri oldu. Azərbaycan Respublikasının Prezidenti İlham Əliyevin sammitdəki məzmunlu və strateji çıxışı ölkəmizin yalnız regional deyil, qlobal geosiyasi proseslərdə aktiv aparıcı actor kimi çıxış etdiyini bir daha sübut etdi. Ölkə başçısının Asiya qitəsində sülh, təhlükəsizlik və iqtisadi inteqrasiyaya dair irəli sürdüyü təşəbbüslər sammit iştirakçıları tərəfindən böyük maraqla qarşılandı.
Prezident İlham Əliyev öz çıxışında Azərbaycanın müstəqil, prinsipial və suverenliyə əsaslanan xarici siyasət kursunu xüsusi vurğuladı. Qeyd olundu ki, Azərbaycan beynəlxalq hüququn norma və prinsiplərinə hər zaman sadiq qalıb və bütün dövlətlərlə qarşılıqlı hörmət çərçivəsində əməkdaşlığın tərəfdarıdır. AQEM platforması çərçivəsində irəli sürülən etimadquruculuğu tədbirləri də məhz bu fundamental prinsiplərə əsaslanır.
Çıxışın vacib məqamlarından biri də regional nəqliyyat və loqistika dəhlizlərinin inkişafı ilə bağlı idi. Ölkə başçısı Şərq-Qərb və Şimal-Cənub nəqliyyat marşrutlarının kəsişməsində yerləşən Azərbaycanın tranzit potensialının yüksək səviyyədə olduğunu diqqətə çatdırdı. Bu layihələr təkcə Azərbaycanın iqtisadiyyatına deyil, bütövlükdə Avrasiya məkanında iqtisadi inteqrasiyanın və təhlükəsizliyin möhkəmlənməsinə xidmət edir.
Məqalənin yekununda qeyd edilməlidir ki, Prezidentin çıxışı Azərbaycanın beynəlxalq nüfuzunun artmasının aydın göstəricisidir. Üzv dövlətlərin Azərbaycana olan inamı ölkəmizin AQEM-ə uğurla sədrlik etməsində və sədrlik müddətinin uzadılmasında öz əksini tapmışdır. Bu Zirvə Görüşü Azərbaycanın qlobal sülhə və regional sabitliyə verdiyi töhfənin daha bir parlaq səhifəsi kimi tarixdə qalacaqdır.
Rasim Quliyev,
YAP Nizami rayon təşkilatının fəalı
