Aprelin 6-da Tbilisi şəhərində Azərbaycan Respublikasının Prezidenti İlham Əliyev və Gürcüstanın Baş naziri İrakli Kobaxidze mətbuata bəyanatlarla çıxış ediblər. Prezident İlham Əliyevin çıxışı iki ölkə arasındakı strateji tərəfdaşlığın möhkəm əsaslara söykəndiyini və gələcək inkişaf perspektivlərinin geniş olduğunu bir daha nümayiş etdirdi.
Prezident İlham Əliyev çıxışına Gürcüstan tərəfinə dəvət və qonaqpərvərliyə görə təşəkkürünü bildirərək başladı. O, Gürcüstanı “qardaş ölkə” kimi xarakterizə edərək, bu ölkəyə səfərinin Azərbaycan–Gürcüstan əlaqələrinin inkişafına yeni təkan verəcəyinə əminliyini ifadə etdi. Dövlət başçısı vurğuladı ki, iki xalq arasında əsrlər boyu formalaşmış dostluq və qardaşlıq münasibətləri bu gün də uğurla davam etdirilir və müasir dövlətlərarası münasibətlərin möhkəm təməlini təşkil edir.
Çıxışda Gürcüstanın son illərdə əldə etdiyi iqtisadi nailiyyətlər xüsusi qeyd olundu. Prezident İlham Əliyev ölkədə mövcud olan sabit siyasi mühitin və əlverişli investisiya şəraitinin bu uğurların əsas səbəbi olduğunu bildirdi. O, Azərbaycan investorlarının Gürcüstan iqtisadiyyatına böyük maraq göstərdiyini və indiyədək 3,7 milyard dollar həcmində sərmayə qoyulduğunu diqqətə çatdırdı.
İkitərəfli iqtisadi əməkdaşlığın genişləndiyini qeyd edən Prezident, keçən il ticarət dövriyyəsinin 800 milyon dollardan çox olduğunu, cari ilin ilk rübündə isə artımın davam etdiyini vurğuladı. Onun sözlərinə görə, mövcud dinamika qorunarsa, yaxın gələcəkdə bu rəqəmin 1 milyard dollara çatması mümkündür. Bununla yanaşı, tərəflər yeni investisiya layihələri və üçüncü ölkələrdə birgə fəaliyyət imkanlarını da müzakirə ediblər.
Regional məsələlərə toxunan Prezident İlham Əliyev Cənubi Qafqazda yeni geosiyasi reallıqların formalaşdığını qeyd etdi. O bildirdi ki, region ölkələri bu imkanlardan sülh, sabitlik və əməkdaşlıq naminə istifadə etməlidir. Prezident, eyni zamanda, Gürcüstanın regionda sabitliyin qorunmasında oynadığı rolu yüksək qiymətləndirdi.
Azərbaycan ilə Ermənistan arasında sülh prosesinə də toxunan dövlət başçısı, bu prosesin yalnız sənədlərlə deyil, real əməkdaşlıqla möhkəmləndirilməsinin vacibliyini vurğuladı. Bu kontekstdə ticarət əlaqələrinin əhəmiyyətini qeyd edən Prezident, hazırda Azərbaycan ilə Ermənistan arasında ticarətin Gürcüstan vasitəsilə həyata keçirildiyini bildirdi və buna görə Gürcüstan hökumətinə təşəkkür etdi.
Enerji sahəsində əməkdaşlıq da çıxışın əsas mövzularından biri oldu. Prezident İlham Əliyev Azərbaycanın enerji təhlükəsizliyinin təminində mühüm rol oynadığını, ölkə qazının hazırda 16 ölkəyə ixrac edildiyini diqqətə çatdırdı. Gürcüstanın bu prosesdə strateji tranzit ölkə kimi rolu xüsusi vurğulandı. Bakı–Tbilisi–Ceyhan neft kəməri və Cənub Qaz Dəhlizi kimi iri layihələrin region üçün böyük əhəmiyyət daşıdığı qeyd edildi.
Bununla yanaşı, nəqliyyat sahəsində əməkdaşlıq və Orta Dəhlizin inkişafı məsələləri də gündəmdə olub. Prezident bildirdi ki, Azərbaycan və Gürcüstan üzərindən keçən bu dəhliz regionun əsas nəqliyyat arteriyalarından biridir və onun genişləndirilməsi istiqamətində işlər davam etdirilir.
Çıxışının sonunda Prezident İlham Əliyev Azərbaycan–Gürcüstan münasibətlərini digər ölkələr üçün nümunə kimi dəyərləndirdi. O qeyd etdi ki, bu münasibətlər qarşılıqlı hörmət, etimad, ortaq maraqlar və qardaşlıq prinsipləri üzərində qurulub. Dövlət başçısı Gürcüstan xalqına sülh, rifah və xoşbəxtlik arzulayaraq, göstərilən qonaqpərvərliyə görə bir daha minnətdarlığını bildirdi.
Beləliklə, Tbilisidə səsləndirilən bu bəyanat Azərbaycan və Gürcüstan arasında mövcud olan strateji tərəfdaşlığın daha da möhkəmlənəcəyinə və gələcəkdə yeni əməkdaşlıq istiqamətlərinin açılacağına işarə edir.
Mirsadıq Səməndərli,
Yeni Azərbaycan Partiyası, məsləhətçi
