Türk Dövlətləri Təşkilatının (TDT) fəaliyyət coğrafiyası və nüfuzu genişləndikcə, üzv dövlətlər arasında yalnız iqtisadi və mədəni deyil, həm də təhlükəsizlik sahəsində strateji tərəfdaşlıq daha da dərinləşir. Azərbaycan Respublikasının Prezidenti İlham Əliyevin TDT-yə üzv və müşahidəçi dövlətlərin təhlükəsizlik şuralarının katibləri və müvafiq qurumlarının rəhbərləri ilə keçirdiyi qəbul bu istiqamətdə atılan mühüm addımlardan biridir.
Görüşdə regionda dəyişən geopolitika və yeni təhlükəsizlik çağırışları fonunda Türk dövlətlərinin vahid mövqedən çıxış etməsinin vacibliyi vurğulanıb. Müasir dövrdə kibertəhlükəsizlik, hibrid təhdidlər, terrorçuluqla mübarizə və sərhəd təhlükəsizliyi kimi məsələlər çevik koordinasiya tələb edir. Bu baxımdan, təhlükəsizlik şuralarının katibləri səviyyəsində qurulan mütəmadi təmaslar informasiya mübadiləsini sürətləndirir və mümkün risklərə qarşı birgə cavab mexanizmlərinin formalaşmasına xidmət edir.
Müzakirələr göstərir ki, Türk dünyasının inteqrasiyası artıq təkcə siyasi bəyanatlarla məhdudlaşmır, eyni zamanda milli təhlükəsizlik maraqlarının qorunmasına yönəlmiş əməli platformaya çevrilir. Bakıda reallaşan bu qəbul TDT üzvlərinin regionda sabitlik və təhlükəsizlik zonası yaratmaq iradəsini bir daha nümayiş etdirdi.
Sevinc Salayeva,
YAP Nizami rayon təşkilatının fəalı
