Azərbaycan xalqının Ümummilli Lideri Heydər Əliyev ölkəmizin müstəqilliyinin, milli dövlətçiliyimizin və elmi-intellektual potensialının formalaşmasında əvəzsiz xidmətlər göstərmiş görkəmli şəxsiyyət idi. O, elmə və təhsilə hər zaman strateji sahə kimi yanaşır, Azərbaycanın inkişafını yüksək elmi-intellektual potensiala malik insan kapitalında görürdü. Heydər Əliyevin dövlətçilik fəlsəfəsində alimlərə hörmət, elmi fəaliyyətə dəstək və elmin cəmiyyətin aparıcı qüvvəsinə çevrilməsi əsas prinsiplərdən biri idi.
Heydər Əliyevin respublikamıza rəhbərlik etdiyi bütün dövrlərdə – istər 1969 – 1982-ci illərdə Sovet Azərbaycanına rəhbərlik etdiyi zaman, istərsə də 1993-cü ildən sonra müstəqil Azərbaycanın Prezidenti kimi fəaliyyəti dövründə – elmin inkişafı dövlət siyasətinin mühüm istiqamətlərindən biri olmuşdur.
1969-cu ildən başlayaraq Heydər Əliyev Azərbaycan Elmlər Akademiyasının fəaliyyətinin təkmilləşdirilməsi, elmi-tədqiqat institutlarının maddi-texniki bazasının gücləndirilməsi, gənc kadrların elmi fəaliyyətə cəlb olunması istiqamətində sistemli tədbirlər həyata keçirmişdir. Onun təşəbbüsü ilə respublikada yeni elmi istiqamətlər – neft-kimya, energetika, informatika, ekologiya və kənd təsərrüfatı elmləri üzrə tədqiqat mərkəzləri yaradılmışdır.
Heydər Əliyev daim vurğulayırdı ki, “alim xalqın düşünən beynidir”. Bu fikir onun elmə və elm adamlarına olan münasibətini ifadə edirdi. O, alimlərin sosial vəziyyətinin yaxşılaşdırılmasına, elmi işçilərin əməyinin qiymətləndirilməsinə xüsusi diqqət yetirirdi. Onun rəhbərliyi dövründə bir çox görkəmli alimlər – akademiklər, professorlar, gənc tədqiqatçılar dövlət mükafatlarına, fəxri adlara layiq görülmüşdülər.
1990-cı illərin ağır sosial-iqtisadi şəraitində belə, Heydər Əliyev elmi müəssisələrin qorunub saxlanılmasını, elmi kadrların ölkəni tərk etməməsini prioritet məsələ kimi qarşıya qoymuşdur. Onun təşəbbüsü ilə Azərbaycan Milli Elmlər Akademiyası dövlətin xüsusi qayğısı ilə əhatə olunmuş, elm sahəsində islahatların hüquqi əsaslarını müəyyən edən qərar və fərmanlar imzalanmışdır.
Ulu Öndər dəfələrlə çıxışlarında bildirirdi ki, Azərbaycan xalqı elmi və təhsil səviyyəsinə görə dünyanın qabaqcıl xalqları ilə rəqabət aparmalıdır. Bu baxış sonrakı illərdə elmi kadr hazırlığı sisteminin müasirləşməsinə, gənclərin elmi fəaliyyətə həvəsləndirilməsinə geniş yol açdı.
Heydər Əliyev üçün elm yalnız laboratoriyalarda və institutlarda məhdudlaşan fəaliyyət deyildi. O, elmin tətbiqi nəticələrinin dövlət idarəçiliyində, sənayedə, kənd təsərrüfatında, informasiya texnologiyalarında və mədəni sahələrdə real təsir gücünə malik olmasını vacib hesab edirdi. Buna görə də o, elmi idarəetmə və iqtisadi qərarların elmi əsaslandırılması prinsipini dövlət siyasətinə gətirmişdi. Onun rəhbərliyi ilə qəbul edilən bir sıra strateji proqramlar – “Azərbaycan Respublikasında elmin inkişafı konsepsiyası”, “Neft strategiyası” və digər sənədlər elmi biliklərin dövlət inkişaf planlarında aparıcı yer tutmasının bariz nümunəsidir.
Bu gün Prezident İlham Əliyevin həyata keçirdiyi siyasət də Ulu Öndərin elmə verdiyi dəyərlərin davamıdır. Elm sahəsində struktur islahatları, gənc tədqiqatçılara verilən qrantlar, “Azərbaycan 2030” inkişaf strategiyasında elmin prioritet kimi müəyyənləşdirilməsi Heydər Əliyevin qoyduğu elmi-siyasi kursun uğurlu davamıdır.
Ulu Öndər Heydər Əliyev Azərbaycan elminin və alimlərinin həqiqi himayədarı idi. Onun fəaliyyəti nəticəsində Azərbaycan elmi öz tarixi inkişafında yeni mərhələyə qədəm qoydu, dünya elmi məkanında öz layiqli yerini tutmağa başladı. Heydər Əliyevin elmə və alimlərə göstərdiyi diqqət bu gün də milli elmin inkişafında, intellektual potensialın formalaşmasında canlı ideya mənbəyi kimi yaşayır.
Siyasət Həsənov,
YAP Xəzər rayon təşkilatının məsləhətçisi
