“Zəlzələ 10 saniyədən bir az çox çəkib”
“Azərbaycanın şimal hissəsində – Siyəzən, Quba rayonları ərazisində yerin 65 km dərinliyində 5,5 maqnitudalı zəlzələ olub. Bütün şimal rayonları, Abşeron və Bakıda da hiss olunub. 10 saniyədən bir az çox çəksə də, heç bir fəsad törətməyib”.
Reportyorinfo.az “Qafqazinfo”ya istinadən xəbər verir ki, bunu AMEA nəzdində Respublika Seysmoloji Xidmət Mərkəzinin baş direktoru Qurban Yetirmişli Xəzər dənizində bu gecə baş vermiş zəlzələ ilə bağlı keçirdiyi mətbuat konfransında deyib.
O bildirib ki, FHN əməkdaşları da hazırda yerlərdə araşdırma aparır: “Əhaliyə müraciət edirəm ki, sosial şəbəkələrdəki şayiələrə deyil, rəsmi məlumatlara inansınlar. Rahat evinizdə yatın. Dünənki təkanlar çox dərində olub, heç bir təhlükəsi yoxdur. O dalğa yaşayış məntəqələrində heç bir fəsad törədə bilməz. Əsas təkan ilk saniyələrdə olub. Ondan güclünün olması ehtimalı yoxdur. Sonra da təkanlar olub, lakin zəif olub və ancaq cihazlar qeydə ala bilib”.
Onun sözlərinə görə, Azərbaycanda köhnə seysmik rayonlaşdırma xəritəsi var, lakin müasir tələblərə cavab vermir: “Biz bu məsələni qaldırmışıq və hazırda FHN ilə birgə bu istiqamətlərdə iş aparırıq”.
Direktor bildirib ki, ölkə 8-9 ballıq zəlzələ bölgəsində yerləşir. FHN-in layihələndirmə idarəsində bina tikintiləri zamanı bu məsələ nəzarətdədir.
Qeyd edək ki, RSXM-nin Zəlzələlərin tədqiqatı bürosunun məlumatına görə, 00:01-də Xəzər dənizində zəlzələ qeydə alınıb. Zəlzələ Quba, Xaçmaz, Siyəzən, Sumqayıt və Bakı şəhərlərində, eləcə də Abşeron yarımadasının ətraf əraziıərində 5-4 bala qədər hiss olunub.
