Ulu Öndər Heydər Əliyevin uzaqgörən siyasəti nəticəsində 1974-cü ildə Mingəçevirdə “Azərbaycan” İstilik Elektrik Stansiyasının təməli qoyuldu. Bu mühüm hadisə respublikamızın enerji müstəqilliyinin əsasını təşkil edən dönüş nöqtələrindən biri oldu. O zaman üçün nəhəng sayılan bu layihə, Azərbaycanın sənaye və sosial inkişafına möhkəm təkan verdi.
Heydər Əliyevin şəxsi nəzarəti və bilavasitə rəhbərliyi ilə həyata keçirilən bu təşəbbüs, enerji təhlükəsizliyi sahəsində strateji bir addım idi. Sovet dövründə respublika daxilində belə bir nəhəng enerji mərkəzinin tikilməsi Azərbaycan üçün həm iqtisadi, həm də siyasi əhəmiyyət daşıyırdı. Bu, gələcəkdə daha böyük layihələrin başlanğıcına zəmin yaratdı.
“Azərbaycan” İstilik Elektrik Stansiyası istifadəyə verildiyi gündən etibarən onilliklər boyu ölkənin əsas enerji mənbələrindən biri oldu. Onun fəaliyyəti sayəsində sənaye müəssisələrinin və əhalinin elektrik enerjisinə olan tələbatı fasiləsiz təmin edildi. Həmçinin bu stansiya yeni kadrların yetişdirilməsi baxımından da məktəb rolunu oynadı.
Bu gün Azərbaycan öz enerji siyasətini Heydər Əliyevin müəyyən etdiyi strateji xətt üzrə davam etdirir. Onun əsasını qoyduğu enerji infrastrukturu müasir layihələrlə genişləndirilir, yeni nəsil elektrik stansiyaları tikilir. Lakin “Azərbaycan” İES həmişə enerji tariximizin şərəfli başlanğıcı kimi yaddaşlarda qalacaq.
Nigar Cəlalova
YAP Xəzər rayon təşkilatının fəalı
