Tarixdə elə günlər var ki, onlar təkcə müəyyən bir dövrün siyasi hadisəsi kimi deyil, bütöv bir xalqın taleyini dəyişən dönüş nöqtəsi kimi yadda qalır. Azərbaycanın müasir tarixində 15 İyun – Milli Qurtuluş Günü məhz belə əhəmiyyətli tarixlərdən biridir. Bu gün yalnız hakimiyyət dəyişikliyi ilə xarakterizə olunmur. 15 İyun Azərbaycan xalqının dövlətçiliyin qorunması, müstəqilliyin möhkəmləndirilməsi və ölkənin gələcəyinin etibarlı əllərə həvalə olunması istiqamətində verdiyi mühüm qərarın rəmzidir.
1990-cı illərin əvvəllərində Azərbaycan müstəqilliyini yenicə bərpa etsə də, ciddi daxili və xarici təhlükələrlə üz-üzə qalmışdı. Ermənistanın hərbi təcavüzü nəticəsində torpaqlarımız işğal olunur, ölkə daxilində isə siyasi qarşıdurmalar dərinləşirdi. Dövlət idarəetmə sistemi zəifləyir, müxtəlif silahlı qruplar yaranır, hakimiyyət böhranı getdikcə təhlükəli xarakter alırdı. Yaranmış vəziyyət dövlət müstəqilliyinin taleyini sual altına salmışdı.
Həmin dövrdə Azərbaycan cəmiyyətində ölkəni böhrandan çıxara biləcək təcrübəli və qətiyyətli liderə ehtiyac olduğu fikri formalaşmışdı. Belə bir şəraitdə xalqın ümid ünvanı Ulu Öndər Heydər Əliyev oldu. Onun zəngin siyasi təcrübəsi, dövlətçilik təfəkkürü və milli maraqlara söykənən fəaliyyəti cəmiyyətdə böyük inam yaradırdı.
1993-cü ildə Heydər Əliyevin xalqın təkidli tələbi ilə hakimiyyətə qayıdışı Azərbaycan tarixində yeni mərhələnin başlanğıcını qoydu. Qısa müddət ərzində ölkədə sabitlik bərpa edildi, siyasi qarşıdurmaların qarşısı alındı, dövlət institutlarının fəaliyyəti yenidən quruldu. Hüquqi dövlət quruculuğu istiqamətində mühüm addımlar atıldı və insanların dövlətə inamı bərpa olundu.
Ulu Öndərin fəaliyyətində milli həmrəyliyin təmin olunması xüsusi yer tuturdu. O, yaxşı bilirdi ki, daxili sabitlik olmadan iqtisadi inkişaf, güclü ordu quruculuğu və beynəlxalq nüfuz əldə etmək mümkün deyil. Buna görə də həyata keçirilən siyasətin əsas istiqamətlərindən biri cəmiyyətdə birlik və həmrəyliyin möhkəmləndirilməsi oldu.
Milli Qurtuluşdan sonra Azərbaycan inkişaf yoluna qədəm qoydu. Ölkədə iqtisadi islahatlar həyata keçirildi, xarici investisiyalar cəlb olundu, enerji strategiyası formalaşdırıldı və beynəlxalq əməkdaşlıq genişləndirildi. Azərbaycanın geosiyasi əhəmiyyəti artdı, ölkəmiz regionun aparıcı siyasi və iqtisadi güc mərkəzlərindən birinə çevrildi.
Ulu Öndər Heydər Əliyevin müəyyən etdiyi inkişaf strategiyası yalnız mövcud problemlərin həllinə deyil, dövlətin uzunmüddətli gələcəyinin təmin olunmasına hesablanmışdı. Azərbaycanın müasir dövlət quruculuğu modeli də məhz bu uzaqgörən siyasətin nəticəsi kimi formalaşdı.
Bu gün Prezident İlham Əliyevin rəhbərliyi ilə həmin siyasi kurs uğurla davam etdirilir və yeni məzmunla zənginləşdirilir. Son illərdə Azərbaycanın əldə etdiyi nailiyyətlər, beynəlxalq nüfuzunun artması, iqtisadi gücünün möhkəmlənməsi və xüsusilə Vətən müharibəsində qazanılmış tarixi Zəfər bunun ən parlaq nümunəsidir. Azərbaycan torpaqlarını işğaldan azad etməklə yanaşı, bütün dünyaya milli birliyin, güclü dövlət iradəsinin və məqsədyönlü siyasətin nəticəsini nümayiş etdirdi.
Hazırda işğaldan azad edilmiş ərazilərdə genişmiqyaslı bərpa və quruculuq işlərinin aparılması, regionda yeni iqtisadi və nəqliyyat layihələrinin həyata keçirilməsi Azərbaycanın inkişaf potensialını daha da artırır. Bütün bunlar vaxtilə Milli Qurtuluşun yaratdığı siyasi sabitliyin və möhkəm dövlətçilik təməlinin bəhrəsidir.
15 İyun Milli Qurtuluş Günü Azərbaycan xalqının dövlətçilik salnaməsində xüsusi yer tutur. Bu tarixin siyasi və tarixi əhəmiyyəti ondan ibarətdir ki, həmin gün verilən qərarlar yalnız bir dövrün deyil, gələcək nəsillərin taleyini müəyyənləşdirdi. Milli Qurtuluş bir daha sübut etdi ki, güclü dövlət xalqın iradəsi, uzaqgörən liderlik və milli maraqlara əsaslanan siyasət üzərində qurulur. Azərbaycanın keçdiyi inkişaf yolu da bu həqiqətin ən parlaq təsdiqidir.
Nəzrin Bayramova,
YAP Xəzər rayon təşkilatının məsləhətçisi
