4 Oktyabr – Cəbrayılın Azad Olunması və Böyük Qayıdışın Başlanğıcı
4 oktyabr 2020-ci il tarixi Azərbaycanın müasir hərb və dövlətçilik salnaməsinə qızıl hərflərlə yazılmış şanlı bir səhifədir. 44 günlük Vətən müharibəsinin 8-ci günündə Müzəffər Ali Baş Komandan İlham Əliyevin xalqa müraciəti ilə Cəbrayıl şəhərinin və rayonun bir neçə kəndinin işğaldan azad edilməsi xəbəri elan olundu. Bu, Vətən müharibəsində azad edilən ilk rayon mərkəzi idi və döyüşlərin gedişində həlledici dönüş nöqtələrindən birinə çevrildi.
1993-cü ildə işğal olunan Cəbrayıl rayonu 27 il ərzində düşmən tapdağı altında qalmış, rayonun bütün infrastrukturu, tarixi və mədəni abidələri tamamilə dağıdılmışdı. İllər boyu davam edən həsrətə 2020-ci ilin payızında Azərbaycan Ordusunun həyata keçirdiyi uğurlu əks-hücum əməliyyatları nəticəsində son qoyuldu və tarixi ədalət bərpa edildi.
Cəbrayılın azad olunması hərbi-strateji baxımdan da müstəsna əhəmiyyət kəsb edirdi. Düşmənin illər boyu qurduğu möhkəm mühəndis-istehkam xətləri məhz bu istiqamətdə yarıldı və bu qələbə Ordumuza Zəngilan, Qubadlı, Laçın və Şuşa istiqamətində irəliləmək üçün geniş imkanlar açdı. Eyni zamanda, Cəbrayılın azad edilməsi ilə Araz boyu dövlət sərhədimiz üzərində nəzarət mərhələli şəkildə bərpa olundu.
Müzəffər Ali Baş Komandanın müvafiq Sərəncamına əsasən, xalqımızın bu tarixi Zəfərini əbədiləşdirmək məqsədilə hər il 4 oktyabr tarixi “Cəbrayıl Şəhəri Günü” kimi təntənəli şəkildə qeyd olunur. Bundan əlavə, əməliyyatda igidlik göstərmiş minlərlə hərbi qulluqçumuz “Cəbrayılın azad olunmasına görə” medalı ilə təltif edilmişdir.
Bu gün Cəbrayılda “Böyük Qayıdış” proqramı çərçivəsində genişmiqyaslı bərpa və yenidənqurma işləri həyata keçirilir. Müasir infrastrukturlar, yaşayış kompleksləri, məktəblər və “Araz Vadisi İqtisadi Zonası” kimi mühüm layihələr sayəsində Cəbrayıl yenidən canlanır, öz doğma sakinlərinə qucaq açır.
Regina Kovalyova,
YAP Nizami rayon təşkilatının fəalı
