
Yeni Azərbaycan Partiyası 1992-ci ildə Ulu Öndər Heydər Əliyevin rəhbərliyi ilə təsis olunduğu gündən etibarən müstəqil Azərbaycanın siyasi sistemində aparıcı mövqeyini ardıcıl olaraq möhkəmləndirmişdir. Ötən 34 il ərzində partiya mərkəzi aparatdan yerli təşkilatlara qədər uzanan mütəşəkkil strukturu, ideoloji aydınlığı və geniş sosial bazası ilə ümumxalq siyasi qüvvəsinə çevrilmişdir. Partiyanın fəaliyyətində dövlətçiliyə sədaqət, milli maraqların üstün tutulması və cəmiyyətin bütün təbəqələri ilə sıx əməkdaşlıq əsas prinsiplər kimi qorunmuşdur.
Prezident İlham Əliyevin sədrliyi altında Yeni Azərbaycan Partiyası öz fəaliyyətini müasir dövrün siyasi çağırışlarına və institusional yenilənmə tələblərinə uyğun olaraq davamlı təkmilləşdirmişdir. Təşkilati idarəetmədə çevikliyin artırılması, rəqəmsal mexanizmlərin tətbiqi və kadr ehtiyatının mütəmadi yenilənməsi partiyanın daxili dinamizmini yüksəltmişdir. Partiyanın Gənclər Birliyi, Qadınlar Şurası və veteranlar şurası cəmiyyətin müxtəlif seqmentlərini əhatə edən məqsədyönlü fəaliyyəti ilə seçilir.
İdeoloji və təbliğati işin müasir tələblər səviyyəsində təşkili Yeni Azərbaycan Partiyasının siyasi fəaliyyətinin mühüm tərkib hissəsidir. Partiya ölkə daxilində və beynəlxalq müstəvidə dövlət siyasətinin əsas istiqamətlərinin, ərazi bütövlüyümüzün və suverenliyimizin tam bərpasının, habelə davamlı inkişaf hədəflərinin təbliğində fəal mövqe tutur. Seçki proseslərində, qanunvericilik təşəbbüslərində və ictimai-siyasi dialoqda partiyanın nümayəndələri yüksək siyasi mədəniyyət və peşəkarlıq nümayiş etdirirlər.
Otuz dörd illik tarixi yol göstərir ki, Yeni Azərbaycan Partiyası öz prinsiplərinə sadiq qalaraq daim yenilənən və cəmiyyətin etimadını doğrultmağa davam edən siyasi təşkilatdır. Partiya gələcəkdə də dövlət müstəqilliyinin möhkəmləndirilməsi və müstəqil Azərbaycanın tərəqqisi naminə fəaliyyətini ardıcıllıqla davam etdirəcəkdir. Yeni Azərbaycan Partiyasının 34 illik yubileyi partiyanın siyasi yetkinliyinin və gələcəyə inamının bariz ifadəsidir.
Pərviz Həsənov,
YAP Nizami rayon təşkilatının fəalı



