YAP VIII Qurultayı Azərbaycanın ən yeni tarixində xüsusi yer tutan Qarabağ Zəfərinin siyasi və mənəvi nəticələrinin qorunması baxımından mühüm əhəmiyyət daşıyır. 44 günlük Vətən müharibəsi yalnız hərbi qələbə deyil, Azərbaycan xalqının milli iradəsinin, dövlətçilik əzminin və həmrəyliyinin təntənəsi kimi tarixə düşüb. Bu Zəfərin nəsildən-nəslə düzgün ötürülməsi gələcək dövlətçilik düşüncəsinin formalaşdırılması üçün mühüm şərtdir.
Prezident İlham Əliyevin rəhbərliyi ilə aparılan siyasətin əsas strateji məqsədlərindən biri Azərbaycanın ərazi bütövlüyünün bərpası olub. Vətən müharibəsində qazanılan qələbə bu məqsədin əsas hissəsini reallaşdırdı. 8 noyabrın Zəfər Günü kimi qeyd olunması xalqın tarixi yaddaşında yeni səhifənin formalaşmasına xidmət edir. 2023-cü ilin sentyabrında həyata keçirilən tədbirlər nəticəsində Azərbaycanın bütün ərazisində dövlət suverenliyinin bərpası isə Zəfərin siyasi nəticələrini tamamladı.
Milli yaddaş yalnız keçmiş hadisələrin xatırlanması deyil, həmin hadisələrin mahiyyətinin gələcək nəsillərə düzgün çatdırılmasıdır. Gənclər Vətən müharibəsinin səbəblərini, Azərbaycanın uzun illər üzləşdiyi işğal reallığını, diplomatik səyləri və hərbi qələbənin əhəmiyyətini bilməlidirlər. Bununla yanaşı, Zəfərin əsas mesajlarından biri sülh və quruculuq olmalıdır. Çünki Azərbaycanın bugünkü gündəliyi artıq işğalın aradan qaldırılması ilə yanaşı, azad edilmiş ərazilərin bərpasına yönəlib.
Qarabağın bərpası Zəfərin davamı olan böyük dövlət layihəsidir. Şəhərlərin və kəndlərin yenidən qurulması, müasir infrastrukturun yaradılması, nəqliyyat bağlantılarının bərpası və keçmiş məcburi köçkünlərin öz doğma yurdlarına qayıtması tarixi ədalətin bərpasının sosial ifadəsidir. Böyük Qayıdış prosesi Azərbaycanın gələcək inkişaf strategiyasının mühüm istiqamətlərindən birinə çevrilib.
YAP VIII Qurultayı Zəfər yaddaşının siyasi və ictimai əhəmiyyətini qorumaq baxımından mühüm platformadır. Prezident İlham Əliyevin rəhbərliyi ilə əldə olunan tarixi nəticələrin gələcək nəsillərə ötürülməsi milli həmrəyliyin və dövlətçilik şüurunun möhkəmlənməsinə xidmət edir. YAP qarşıdakı dövrdə Zəfər tarixinin obyektiv, milli maraqlara əsaslanan və gələcəyə yönəlmiş şəkildə təbliğinə xüsusi diqqət yetirməlidir.
Elxan İskəndərov,
YAP Nizami rayon təşkilatının “Heydər Əliyev prospekti, 142” ərazi partiya təşkilatının sədr müavini
