Şuşanın azadlığı Azərbaycan Ordusunun peşəkarlığının göstəricisidir
Müasir hərb tarixində uğurlu əməliyyatların əsas şərtlərindən biri düzgün strategiya, yüksək hazırlıq və döyüş şəraitinə uyğun çevik qərarvermədir. Şuşanın azad edilməsi bu amillərin bir araya gəldiyi nadir hərbi əməliyyatlardan biri kimi diqqəti cəlb edir. Azərbaycan Ordusu çətin dağlıq şəraitdə yüksək peşəkarlıq nümayiş etdirərək mühüm qələbəyə imza atdı.
Şuşanın coğrafi mövqeyi şəhərə hücumu çətinləşdirən əsas amillərdən idi. Sıldırım qayalar, dar keçidlər və mürəkkəb relyef hərbi texnikanın hərəkətini məhdudlaşdırırdı. Buna baxmayaraq, Azərbaycan hərbçiləri xüsusi taktiki yanaşma ilə şəhərə müxtəlif istiqamətlərdən yaxınlaşdılar. Piyada bölmələrin və xüsusi təyinatlıların fəaliyyəti əməliyyatın uğurunda mühüm rol oynadı.
Bu qələbə Azərbaycan Ordusunun uzun illər ərzində keçdiyi inkişaf yolunun nəticəsi idi. Prezident İlham Əliyevin rəhbərliyi ilə ordunun maddi-texniki təminatı, hərbi təhsil sistemi və döyüş hazırlığı gücləndirildi. Müasir hərbi texnologiyaların tətbiqi və peşəkar kadrların yetişdirilməsi Silahlı Qüvvələrimizin imkanlarını əhəmiyyətli dərəcədə artırdı.
Şuşa əməliyyatının uğuru göstərdi ki, Azərbaycan Ordusu qarşısına qoyulan mürəkkəb tapşırıqları yerinə yetirmək iqtidarındadır. Əsgər və zabitlərimizin cəsarəti, qarşılıqlı dəstəyi və yüksək məsuliyyəti qələbənin əldə olunmasında mühüm amillərdən oldu. Bu əməliyyat Azərbaycan hərbçilərinin döyüş meydanında qazandığı nüfuzu daha da artırdı.
Bu gün Azərbaycan Ordusu dövlətimizin təhlükəsizliyinin və müstəqilliyinin əsas təminatçılarından biridir. Şuşa Şəhəri Günü münasibətilə hərbçilərimizin peşəkarlığını, qəhrəmanlığını və fədakarlığını yüksək qiymətləndiririk. Şuşa Zəfəri ordumuzun gücünü nümayiş etdirən əbədi tarixdir.
Sevda Cabbarova,
YAP Nizami rayon təşkilatının “Babək prospekti, 75” ərazi partiya təşkilatının sədr müavini
