Şuşa – Azərbaycan Ordusunun mənəvi gücünün təntənəsi
Hərbi qələbələrin əldə olunmasında silah və texnika ilə yanaşı, əsgərin mənəvi hazırlığı, Vətənə bağlılığı və döyüş əzmi də mühüm rol oynayır. Şuşanın azad edilməsi Azərbaycan Ordusunun məhz bu xüsusiyyətlərini bütün dünyaya nümayiş etdirdi. Şəhərin mürəkkəb coğrafi şəraitdə azad olunması hərbçilərimizin yüksək iradəsinin və peşəkarlığının göstəricisi oldu.
Şuşa uğrunda döyüşlərdə Azərbaycan əsgəri qarşısına qoyduğu müqəddəs məqsədə çatmaq üçün böyük fədakarlıq göstərdi. Dağlıq ərazi, sıldırım qayalar və çətin keçidlər hərbi əməliyyatların mürəkkəbliyini artırsa da, hərbçilərimizin irəliləyişinə mane ola bilmədi. Onların qəhrəmanlığı Azərbaycan hərb tarixində xüsusi yer tutdu.
Prezident, Müzəffər Ali Baş Komandan İlham Əliyevin rəhbərliyi ilə aparılan ordu quruculuğu işləri bu qələbənin əsasını təşkil edən amillərdən biri idi. Müasir silahlarla təchizat, peşəkar kadr hazırlığı, döyüş qabiliyyətinin artırılması və hərbi intizamın möhkəmləndirilməsi Ordumuzun gücünü daha da artırdı. Vətən müharibəsi bu hazırlığın real nəticəsini nümayiş etdirdi.
Şuşanın azad edilməsi yalnız hərbi əməliyyatın uğurla başa çatması deyildi. Bu, Azərbaycan əsgərinin mənəvi üstünlüyünün, torpağa bağlılığının və milli məsuliyyətinin ifadəsi idi. Şəhərin azadlığı uğrunda canından keçən şəhidlərimizin və sağlamlığını itirən qazilərimizin fədakarlığı heç vaxt unudulmayacaq.
Bu gün Şuşada dalğalanan Bayraq Azərbaycan Ordusunun qüdrətini və mənəvi gücünü təcəssüm etdirir. Şuşa Şəhəri Günü münasibətilə bütün hərbçilərimizə minnətdarlığımızı bildirir, şəhidlərimizin əziz xatirəsini ehtiramla yad edirik.
Əhməd Talıbov,
YAP Nizami rayon təşkilatının “Heydər Əliyev prospekti, 152” ərazi partiya təşkilatının sədri
